Serbııa beıbit maqsattaǵy ıadrolyq baǵdarlama ázirleýge kiristi

BELGRAD. KAZINFORM — Serbııa beıbit maqsatta ulttyq ıadrolyq baǵdarlamany júzege asyrýǵa daıyndyqty bastady. Bul týraly eldiń Taý-ken óndirisi jáne energetıka mınıstri Dýbravka Djedovıch-Handanovıch ıAdrolyq ǵylymdar ınstıtýty – «Vıncha» ókilderimen kezdesý barysynda málimdedi, dep jazdy TASS.

«Vıncha» ınstıtýtynyń dırektory Slavko Dımovıchtiń aıtýynsha, bul ınstıtýt ǵylymı jáne bilim berý turǵysynan osy baǵdarlamany basqarýǵa nıetti.

— Serbııa Energetıka týraly zańǵa ózgerister engizý arqyly beıbit maqsattaǵy ıadrolyq energetıkany damytýǵa jol ashty. Óıtkeni biz bolashaqtaǵy energetıkalyq qaýipsizdik týraly strategııalyq turǵyda oılanýymyz kerek. Bul — kadrlyq áleýetti nyǵaıtpaı múmkin emes, al bizde jaqsy negiz bar. Degenmen, ony ári qaraı jetildirýdi kózdeımiz. Biz «Vıncha» ınstıtýtyn elimizdegi ıadrolyq baǵdarlamanyń irgetasy retinde moıyndadyq. Taý-ken óndirisi jáne energetıka mınıstrligi úkimet atynan ıadrolyq baǵdarlamany júzege asyratyn organ retinde ıadrolyq energetıkaǵa arnalǵan arnaıy sektor qurýmen aınalysyp jatyr, — dedi mınıstr, onyń sózin «Vecherne novostı» gazeti keltiredi.

«Vıncha» ınstıtýtynyń dırektory Slavko Dımovıch ınstıtýttyń ıadrolyq baǵdarlamany ǵylymı jáne bilim berý baǵytynan basqarýǵa umtylatynyn atap ótti.

— Bizdiń maqsatymyz — beıbit ıadrolyq energetıka salasynda aımaqtyq bilim berý ortalyǵyna aınalý. Sonymen qatar, ınstıtýt janynan ıadrolyq energetıkaǵa qatysty ártúrli salalardan, ınstıtýt ishinen jáne syrtynan mamandardy biriktiretin saraptamalyq komıssııa quryldy. Bul komıssııa bolashaqta memleketke beıbit ıadrolyq energetıkany damytýda qoldaý kórsetetin bolady, — dedi ol.

Mınıstr Djedovıch-Handanovıch Serbııada beıbit ıadrolyq energııany paıdalaný boıynsha aldyn ala tehnıkalyq zertteý aıaqtalýǵa jaqyn ekenin aıtty. Onyń aıtýynsha, bul — ıadrolyq baǵdarlamany damytýdaǵy alǵashqy qadam bolyp tabylady jáne ol naryqtyq ári tehnologııalyq múmkindikterdi kórsetip, ári qaraı qandaı sheshimder qabyldanatynyn aıqyndaıdy.

2025 jyldyń mamyrynda Reseıdiń memlekettik korporatsııasy «Rosatom» Serbııada atom energetıkasy salasyndaǵy zamanaýı tehnologııalardy tanystyrǵan bolatyn. Kompanııa eldiń energetıkalyq táýelsizdigin nyǵaıtý úshin keń aýqymdy sheshimder usynýǵa daıyn ekenin bildirdi. Bul tanystyrylym «Batys Balqandaǵy energetıkalyq kóshý» atty halyqaralyq forým aıasynda ótti. Onda atom energııasy senimdi ári kómirteksiz qýat kózi retinde erekshe atalyp ótti.

Serbııaǵa RITM-200 reaktorlaryna negizdelgen shaǵyn atom stantsııalary men 3+ býyndaǵy iri qýatty energobloktar usynyldy.

Buǵan deıin «Rosatom» bas dırektory Alekseı Lıhachev Reseı prezıdenti Vladımır Pýtın men Serbııa prezıdenti Aleksandr Výchıch arasyndaǵy kelissózder nátıjesin túsindire otyryp, bul kezdesýler Serbııada atom elektr stantsııalaryn ornalastyrýǵa baǵyttalǵan jańa kezeńniń bastalǵanyn bildiretinin aıtqan. Ol atom energetıkasy endi Reseı-Serbııa resmı qatynastarynyń kún tártibine engenin atap ótti.

Eske sala keteıik, buǵan deıin Serbııada mıtıng ótip, halyq shuǵyl kezekten tys saılaý ótkizýdi talap etken edi.