Serbııa basshysy bıyl Astanaǵa keledi

ASTANA. KAZINFORM – Memleket basshysy Serbııa Prezıdenti Aleksandr Výchıchpen kelissóz júrgizdi, dep habarlaıdy Aqordanyń baspasóz qyzmeti.

Qazaqstan Prezıdenti Qasym-Jomart Toqaev byltyr qarasha aıynda Belgradqa jasaǵan resmı saparyn yqylaspen eske alyp, onyń eki el dostyǵyn nyǵaıtýdaǵy jáne san qyrly yntymaqtastyqty damytýdaǵy mańyzyna toqtaldy.

Sapar aıasynda saýda jáne ınvestıtsııa, ónerkásip, energetıka, qurylys, aýyl sharýashylyǵy, kólik, tsıfrlandyrý, jasandy ıntellekt, sondaı-aq áskerı qorǵanys ónerkásibi salalaryna qatysty kelisimderge qol qoıylǵan bolatyn.

Aleksandr Výchıch Serbııanyń Qazaqstanmen strategııalyq seriktestik aıasyn odan ári keńeıtýge múddeli ekenin málimdedi.

Memleketter basshylary buǵan deıin qol jetkizilgen ýaǵdalastyqtardy júzege asyrýǵa qos tarap ta beıil ekenin rastap, ekijaqty jáne kópjaqty kún tártibindegi máselelerdi Serbııa Prezıdentiniń bıyl Astanaǵa josparlanǵan sapary kezinde talqylaýǵa kelisti.

Osyǵan deıin Qazaqstanǵa Abý Dabıdiń Taq murageri keletini týraly habarlaǵan bolatynbyz.