Serbııa astanasyndaǵy jappaı sherý tártipsizdikke ulasty
ASTANA.KAZINFORM — Tártipsizdikter Belgradta stýdentterdiń narazylyq mıtıngi ótip jatqan jerde bastaldy, dep jazdy DW.
Tártipsizdikter Belgrad ortalyǵyndaǵy Pionirskog saıabaǵy mańynda órshidi, onda serb joǵary oqý oryndarynyń narazylyq bildirip jatqan stýdentteri jınalǵan mıtıng Slavııa ortalyq alańynda ótip jatqan bolatyn. Bul týraly Nova telearnasy men AP agenttigi habarlady.
Nova derekterine sáıkes, polıtsııa jınalǵandardy Joǵarǵy sot ǵımaraty ornalasqan zań fakýlteti ǵımaratyna qaraı yǵystyryp jatyr, parlament mańynda kózden jas aǵyzatyn gaz qoldanylǵan, jaryq-dybys granatalarynyń jarylystary estilgen. Basylym nusqasy boıynsha, narazylar polıtsııaǵa qarsy fakelder, tastar jáne qoldan jasalǵan jarylǵysh zattar qoldanǵan.
— Búgin keshke Slavııadaǵy jarııa jıyn aıaqtalǵannan keıin qoǵamdyq tártipti qamtamasyz etip turǵan polıtsııa qyzmetkerlerine shabýyl jasaǵandardyń barlyǵy zańǵa sáıkes anyqtalyp, jaýapqa tartylady, — dedi Belgrad prokýratýrasy.
Sonymen qatar, olar mundaı shabýyldardy «qatań túrde aıyptaıtynyn» jáne polıtsııa qyzmetkerlerine shabýyl jasaý qylmystyq quqyqbuzýshylyq ekenin eskertti. Tártipsizdikterge baılanysty 23 adam ustaldy, dep málimdedi eldiń ishki ister mınıstri Ivıtsa Dachıch.
Buǵan deıin ondaǵan myń adam stýdent uıymdastyrǵan mıtıngige qatysqan — bul prezıdent Aleksandr Výchıch úkimetiniń jappaı sherýlerdi toqtatýǵa tyrysqanyna qaramastan bolǵan, dep atap ótti AP agenttigi. Jınalǵandardyń kópshiligi plakattar ustap, «Stýdentter jeńedi» atty jastar qozǵalysynyń uranymen jazylǵan fýtbolkalar kıgen.
Sol kúni Belgradqa Serbııanyń basqa qalalarynan avtokólik kolonnalary kelip jetti. Memlekettik temirjol kompanııasy 23 mamyrda Belgradqa jáne odan shyǵatyn barlyq poıyz reısterin toqtatyp, basqa aımaqtardan adamdardyń jappaı kelýine jol bermeýge tyrysqan.
Serbııada bir jyldan astam ýaqyt boıy jappaı narazylyqtar jalǵasyp keledi
Serbııadaǵy úkimetke qarsy protestter 2024 jyldyń qarashasynda Novı-Sadtaǵy jóndeýden ótken temirjol vokzalyndaǵy beton qalqanyń qulaýynan keıin bastalǵan, sol kezde 16 adam qaza tapty.
2025 jyldyń qańtarynda narazylyqtar aıasynda Serbııa premer-mınıstri ári Novı-Sadtyń burynǵy meri Mılosh Výchevıch otstavkaǵa ketti.
2025 jyldyń jeltoqsanynda Serbııa prezıdenti Aleksandr Výchıch Ulttyq skýpşınaǵa (bir palataly parlament) kezekten tys saılaý 2026 jyly ótetinin rastady.
