Senatta salyq saıasatyn jetildirý máselesi talqylandy
ASTANA. KAZINFORM – Senattyń Qarjy jáne bıýdjet komıtetiniń depýtattary múddeli memlekettik organdarmen jáne «Atameken» UKP-nyń ókilderimen kezdesti. Onda salyq saıasatynyń ekonomıkadaǵy jekelegen salalarǵa qatysty problemalyq máseleler, sondaı-aq zańnamany jetildirý jónindegi birlesken usynystar talqyǵa tústi.
Kezdesýge qatysýshylar mańyzdy máselelerdi kóterdi, onyń ishinde jer qoınaýyn paıdalanýshylarǵa paıdaly qazbalardy óndirý salyǵyn tóleýden roıaltı júıesine erikti túrde kóshý quqyǵyn berý múmkindigi talqylandy. Sondaı-aq salyq tóleýshilerdiń táýekel deńgeıin baǵalaý sharttaryn qaıta qaraý qajettigi de atap ótildi. Qazaqstanda metall buıymdaryn óndirýdiń kenje qalýy da talqyǵa salyndy, óıtkeni osy materıaldy paıdalanatyn mashına jasaý kásiporyndaryna óz ónimderin óndirýge qıyndyqtar týǵyzady.
Senat depýtattary bızneske de, memleketke de tıimdi bolatyn teńestirilgen sheshimderdi tabý úshin ashyq talqylaýdy jalǵastyrýdyń mańyzdylyǵyn tilge tıek etti.
Bul máseleler Memleket basshysynyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Qazaqstan halqyna Joldaýyn iske asyrý aıasynda aldaǵy «Salyq saıasatynyń jáne salyqtyq ákimshiliktendirýdi jetildirýdiń tujyrymdamalyq máseleleri» taqyrybyndaǵy dóńgelek ústelge daıyndyq aıasynda talqylandy.
