Senatta QR Úkimeti men Azııa damý banki arasyndaǵy kelisim qaraldy

NUR-SULTAN. QazAqparat - Senatta Olga Perepechınanyń tóraǵalyq etýimen Qarjy jáne bıýdjet komıtetiniń keńeıtilgen otyrysy ótti, dep. habarlaıdy QazAqparat joǵary palatanyń baspasóz qyzmetine silteme jasap. Onda «Áriptestik týraly negizdemelik kelisimdi (2014 jylǵy 4 mamyrdaǵy Qazaqstan Respýblıkasynyń Úkimeti men Azııa damý banki arasyndaǵy Qazaqstan Respýblıkasyn ekonomıkalyq ártaraptandyrý jáne onyń ornyqty damýyna, jalpy ósýine járdemdesý maqsatynda yntymaqtastyqty kúsheıtý jónindegi áriptestik týraly negizdemelik kelisimge túzetýler men tolyqtyrýlar) ratıfıkatsııalaý týraly» zań jobasy qaraldy.

Otyrysta baıandama jasaǵan ulttyq ekonomıka mınıstriniń orynbasary Jaslan Mádıev Kelisimde memlekettik kepildikpen qaryz alý kezinde Azııa damý bankiniń saıasaty men erejelerin qoldaný jóninde erejeler belgilengenin atap ótti. «Onda taýarlar, jumystar men qyzmetterdi satyp alýdaǵy sybaılas jemqorlyqqa qarsy saıasat jáne ekologııalyq jáne áleýmettik qorǵaý sharalary, negizgi eńbek standarttary, tólemder, aqparattardy ashý, genderlik damýdaǵy erejeler bar», - dedi ol.

Onyń aıtýynsha, memlekettik kepildikpen berilgen qaryz sharttaryn taratý jobalardy qarjylandyrý quraldaryn keńeıtýge múmkindik beredi.

Senat depýtaty Nurlan Qylyshbaev qaralyp otyrǵan Kelisim ekonomıkany damytýǵa baǵyttalǵanyn jáne Qazaqstan Respýblıkasy Úkimeti men Azııa damý bankiniń arasyndaǵy áriptestikti nyǵaıtýǵa jasalǵan taǵy bir qadam ekenin atap ótti.

«Elimizdiń ekonomıkalyq damýyna Azııa damý bankiniń qyzmeti jumys oryndaryn qurý, ınnovatsııalardy yntalandyrý, áleýetti ulǵaıtý, bilim men úzdik halyqaralyq praktıkalardy engizý negizinde keń aýqymdy qoldaý kórsetý arqyly óz úlesin qosýda. Azııa damý banki qaryzdan bólek, «Nurly jol», «Bıznestiń jol kartasy», «Tsıfrlik Qazaqstan», agroónerkásipti damytý memlekettik baǵdarlamalary boıynsha tehnıkalyq kómek kórsetedi», - dedi N.Qylyshbaev.

Zań jobasyn qabyldaý jobalardy qarjylandyrý quraldaryn keńeıtýge jáne aýyl sharýashylyǵy, kólik jáne ekonomıkanyń basqa da sektorlarynda memlekettik qaryzdar jáne memlekettik kepildikpen qaryzdar túrinde ınvestıtsııalar tartýdyń qosymsha múmkindikterin berý jolymen ınvestıtsııalyq jobalardy iske asyrýǵa ADB-nyń salymyn ulǵaıtýǵa múmkindik beredi.

Zań jobasy Palata qaraýyna jiberildi.