Senatta Qazaqstanda demokratııalyq reformalardy iske asyrý barysy talqylandy
Senat tóraǵasy Máýlen Áshimbaev EQYU-nyń Demokratııalyq ınstıtýttar jáne adam quqyqtary jónindegi bıýrosynyń dırektory Matteo Mekachchımen kezdesti.
Kezdesý barysynda elimizde qolǵa alynǵan demokratııalyq reformalar talqylandy jáne Senat pen bıýro arasyndaǵy yntymaqtastyqty damytý máseleleri sóz boldy.
Suhbat kezinde yntymaqtastyqtyń basty baǵyttarynyń biri retinde demokratııalyq reformalardy iske asyrý salasynda tájirıbe almasý ekeni aıtyldy.
«Elimizde Memleket basshysynyń bastamasymen barlyq salada keshendi jáne júıeli jańǵyrtý jumystary júrgizilýde. Bul rette birinshi kezekte saıası júıeni demokratııalandyrýǵa, onyń ashyqtyǵyn qamtamasyz etýge, saıası básekelestikti arttyrýǵa jáne adam quqyqtaryn iske asyrý úshin qajetti jaǵdaı jasaýǵa basa mán beriledi. Qazirdiń ózinde elimizdiń saıası júıesin odan ári jańǵyrtýdy kózdeıtin zańdar toptamasyn qabyldadyq», – dedi Máýlen Áshimbaev.
Sondaı-aq Senat Spıkeri Eýropa keńesi parlamenttik assambleıasynyń kúzgi sessııasynda depýtattar «Qazaqstandaǵy saıası reformalar onyń azamattarynyń qajettilikteri men maqsat-nıetine saı» degen jazbasha deklaratsııa qabyldaǵanyna nazar aýdardy.
Odan bólek, elimizde qolǵa alynǵan saıası reformalardy zańnamalyq turǵydan qamtamasyz etý jolyndaǵy depýtattardyń belsendi jumysyn atap ótti.
Qazirgi tańda Parlament depýtattarynyń aldynda prezıdenttik reformalardyń tórtinshi toptamasyn iske asyrý mindeti tur.
«Prezıdent Joldaýynda depýtattyq mandattardy bólý kezinde áıelder men jastarǵa arnalǵan 30 paıyzdyq kvotanyń mindetti túrde eskerilýin zańmen bekitý kerektigi aıtyldy. Kvota beriletin sanattaǵy azamattardyń tizimin keńeıtý jáne saılaý tiziminde erekshe qajettilikti talap etetin azamattarǵa kvota berý múmkindikterin qarastyrý usynyldy. Memleket basshysy aýyldyq jerlerdegi azamattyq bastamalarǵa qoldaý kórsetýdiń tıimdi tetigin ázirleýdiń mańyzdy ekenine de basa mán berdi», – dedi Senat tóraǵasy.
Sonymen qatar suhbattasýshylar adam quqyqtaryn iske asyrý salasynda Qazaqstan men EQYU yntymaqtastyǵynyń keleshegi zor ekenine toqtalyp, ótken aptada ǵana Qazaqstannyń 2022-2024 jyldarǵa BUU-nyń Adam quqyqtary jónindegi keńesine múshe bolyp saılanǵanyn aıtty.
«Elimizdiń dúnıejúzilik uıymnyń basty quqyq qorǵaý organyna múshe bolyp saılanýy bizdiń osy baǵyttaǵy ıgi bastamalarymyzdyń jarqyn kórinisi. Bul Qazaqstannyń adam quqyqtary men bostandyǵyn qorǵaý salasynda halyqaralyq normalardy jáne standarttardy dáripteýdegi belsendiligi men jaýapkershiligin bildiredi», – dedi Máýlen Áshimbaev.
Óz kezeginde Matteo Mekachchı Qazaqstannyń adam quqyqtaryn qamtamasyz etý jáne eldegi saıası júıeni odan ári demokratııalandyrý baǵytyndaǵy jumystaryn joǵary baǵalady.
