Senatorlarǵa Kýrchatov qalasyndaǵy reaktor kesheni tanystyryldy
ASTANA. KAZINFORM — Abaı oblysynyń Kýrchatov qalasynda Senattyń radıatsııalyq jáne seısmıkalyq qaýipsizdik máseleleri jónindegi halyqaralyq qatynastar, qorǵanys jáne qaýipsizdik komıtetiniń kóshpeli otyrysy ótti, strategııalyq mańyzy bar obektilerdiń qorǵanysy talqylandy. Bul týraly QR ІІM Ulttyq ulanynyń baspasóz qyzmeti málim etti.
Іs — sharaǵa Senat depýtattary, Іshki ister mınıstriniń orynbasary-Ulttyq ulannyń Bas qolbasshysy general-maıor Ańsaǵan Baltabekov jáne Qazaqstan Respýblıkasy Ulttyq ulanynyń «Shyǵys» ÓńQ áskerı qyzmetshileri qatysty.
Kezdesý barysynda general-maıor Ańsaǵan Baltabekov depýtattardy áskerlerdiń qyzmettik-jaýyngerlik qyzmeti, aǵymdaǵy jaǵdaıy jáne damý perspektıvalary týraly egjeı-tegjeıli habardar etti.
— Ulttyq ulan Qazaqstan Respýblıkasy Іshki ister organdarynyń biryńǵaı júıesine kiredi jáne jeke adamnyń, qoǵamnyń jáne memlekettiń qaýipsizdigin qamtamasyz etýge, adam men azamattyń quqyqtary men bostandyqtaryn qylmystyq jáne ózge de quqyqqa qarsy qol suǵýshylyqtardan qorǵaýǵa arnalǵan. Basty mindetterdiń biri — mańyzdy memlekettik obektilerdi qorǵaý. Sondaı-aq Ulttyq ulanǵa basqa da mindetter júktelgen, — dep atap ótti general-maıor Ańsaǵan Baltabekov.
Kóshpeli otyrys aıasynda qonaqtar «Baıkal-1» reaktor kesheniniń qyzmetimen tanysty. Dál osy keshende 1962-1991 jyldar aralyǵynda KSRO-da ıadrolyq zymyran qozǵaltqyshtaryn qurý jumystary júrgizildi. Delegatsııany QR Ulttyq ıadrolyq ortalyǵynyń bas dırektory Erlan Batyrbekov qarsy alyp, qonaqtardy reaktor keshenimen tanystyrdy.
Osy mańyzdy memlekettik obektiniń perımetri boıynsha kúzetti Ulttyq ulannyń «Shyǵys» ÓńQ 3514 áskerı bóliminiń áskerı qyzmetshileri júzege asyrady jáne bolashaqta obektiniń qorǵanys júıesi jańǵyrtýdan ótetin bolady.
Sondaı-aq depýtattar Semeı polıgonynyń tarıhı-ekspozıtsııalyq zalynda bolyp, polıgonnyń ashylý jáne damý tarıhymen, ıadrolyq jarylystardyń saldarymen tanysty. Odan bólek qonaqtar kórnekti fızık-praktık Igor Vasılevıch Kýrchatovtyń ómiri men qyzmetin beıneleıtin jumys kabınetinde boldy. Óz kezeginde general-maıor Ańsaǵan Baltabekov ekspozıtsııa zalynyń Qurmet Kitabyna Ulttyq ulan atynan estelik jazba qaldyrdy.
Budan ári komıtet músheleri № 27 radıonýklıdtik, elementtik saraptama jáne tsıtogenetıkalyq zertteýlerdiń zerthanalyq korpýsynda Qazaqstan Respýblıkasynyń radıatsııalyq jáne seısmıkalyq qaýipsizdiginiń áleýeti týraly bildi. 1964 jyly paıdalanýǵa berilgen zerthanada ıadrolyq jarylystardan zardap shekken adamdar men qorshaǵan orta obektileriniń radıatsııa mólsherin anyqtaıtyn qurylǵynyń saraptamasy kórsetildi.
Osydan keıin halyq qalaýlylary Ulttyq ulannyń 3514 áskerı bóliminiń qyzmettik-jaýyngerlik qyzmetimen tanysty. Delegatsııany 3514 áskerı bóliminiń komandıri polkovnık Saǵynǵalı Bataev alyp júrdi. Birinshi kezekte parlamentshiler oqý-materıaldyq bazamen jáne áskerı qalashyqtyń ınfraqurylymymen tanysty. Sonymen qatar qonaqtarǵa áskerı tehnıka men qarý-jaraq úlgileri kórsetildi.
Áskerı qyzmetshilermen júzdesý barysynda Parlament Senatynyń Halyqaralyq qatynastar, qorǵanys jáne qaýipsizdik komıtetiniń tóraǵasy Andreı Lýkın el basshylyǵy armııanyń jaýyngerlik qabiletin qalyptastyrý, áskerı qyzmettiń bedelin arttyrý jáne Qarýly kúshter men basqa da áskerı quralymdardy materıaldyq-tehnıkalyq jaraqtandyrý máselelerine erekshe nazar aýdaratynyn atap ótti.
Kezdesý sońynda depýtattar ulandyqtarǵa alǵys aıtyp, quqyqtyq tártip áskerleriniń jeke quramy armııa men memleketti nyǵaıtýǵa laıyqty úles qosatynyna senim bildirdi.
