Senatorlar shalǵaı eldimekenderdi aralaıdy
ASTANA. KAZINFORM — Búgin Senat Spıkeri Máýlen Áshimbaevtyń tóraǵalyǵymen Palata Bıýrosynyń otyrysy ótti. Bul týraly Senattyń baspasóz qyzmeti málim etti.
Onda 26 jeltoqsan kúni ótetin Senat otyrysynyń kún tártibi bekitildi jáne depýtattardyń óńirlerge baratyn saparlaryna qatysty máseleler talqylandy.
Іs-shara barysynda Máýlen Áshimbaev jaqyn kúnderi senatorlardyń óńirlerge saparlary bastalatynyn atap ótti. Osyǵan baılanysty ol barlyq múddeli taraptyń keshendi kózqarasyn talap etetin jumystyń negizgi baǵyttary men mindetterine toqtaldy.
– Depýtattardyń óńirlerge saparynyń basty maqsaty – azamattardy alańdatyp otyrǵan ózekti máselelerge basa nazar aýdarý jáne sol problemalardyń oń sheshilýine atsalysý. Sapar kezinde shalǵaı eldimekenderdiń turǵyndarymen, qarapaıym eńbek adamdarymen jáne sharýalarmen kezdesken abzal. Kezdesýler barysynda elimizde júrgizilip jatqan reformalardyń mańyzyn jáne Parlament qabyldaǵan zańdardyń negizgi erejelerin de jan-jaqty túsindirý qajet, – dedi Senat Tóraǵasy.
Sondaı-aq depýtattar Senat otyrysynyń kún tártibin bekitti. Soǵan sáıkes aldaǵy beısenbide bolatyn jyldyń qorytyndy otyrysynda senatorlar «Qazaqstan Respýblıkasynyń keıbir zańnamalyq aktilerine memlekettik qyzmet máseleleri boıynsha ózgerister men tolyqtyrýlar engizý týraly» zańdy qaraıdy. Sonymen birge «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zań da qaralady. Zań arqyly qoǵamdyq jumystarǵa tartý túrinde ákimshilik jaza engiziledi jáne ony oryndaý tetigi aıqyndalady.
Budan basqa, Bıýro otyrysynda Májilisten kelip túsken zańdar jumys úshin Senattyń turaqty Komıtetterine bólinip berildi.
Eske sala keteıik, buǵan deıin Senat Sıngapýrmen aradaǵy alys-beristiń baj salyǵyn jeńildetetin zańdy maquldaǵanyn jazǵan bolatynbyz.