Senatorlar men sarapshylar zań shyǵarý isinde jasandy ıntellektini qoldaný máselesin talqylady
ASTANA. KAZINFORM — Elimizdegi sarapshylar qaýymdastyǵynyń jáne memlekettik organdardyń ókilderi zań shyǵarý qyzmetine jasandy ıntellektini engizý máselelerin talqylap, osy saladaǵy birlesken jumystyń baǵyttaryna nazar aýdardy. Atalǵan jıyn búgin Senat tóraǵasy Máýlen Áshimbaevtyń qatysýymen Tsıfrlyq damý, ınnovatsııalar jáne aeroǵarysh ónerkásibi mınıstrliginiń ahýaldyq ortalyǵynda ótti.
Palata spıkeri óz sózinde reformalardyń tıimdiligi jáne olardy durys iske asyrý kóbine zańnamanyń sapasyna baılanysty ekenin atap ótti. Sondaı-aq ol jańa formatsııadaǵy zańdar daıyndaýǵa ǵylymı-saraptamalyq qoǵamdastyqty jumyldyrýdyń jáne ońtaıly zańnamalyq sheshimder qabyldaýǵa zamanaýı tehnologııalardy qoldanýdyń mańyzy zor ekenin aıtty. Bul rette búginde túrli salada aıtýly nátıjelerge qol jetkizip otyrǵan jasandy ıntellekt tıimdi tetik bola alady.
Senat tóraǵasynyń aıtýynsha, qazirgi tańda elimizde bul sala quqyqtyq turǵydan tolyq rettelmegen.
«Parlament jyl saıyn orta eseppen 100-ge jýyq zań qabyldaıdy. Úkimet pen mınıstrlikter sońǵy on jyldyń ózinde ǵana 30 myńnan astam normatıvtik-quqyqtyq akt qabyldady. Bul aýqymdy derekter jıyntyǵy degen sóz. Normatıvtik-quqyqtyq aktilerdi jańa tehnologııalardyń múmkindikterin paıdalana otyryp taldaý qabyldanatyn zańnamalyq sheshimderdiń sapasyn aıtarlyqtaı arttyratyny anyq. Bizde zańdardy ázirleý men kelisýdiń jekelegen kezeńderi áli de qaǵaz júzinde júrgiziledi, ıaǵnı protsesterdiń bir bóligi tsıfrlandyrylmaǵan. Sondyqtan zań shyǵarý qyzmetinde jasandy ıntellektini, jalpy tsıfrlyq tehnologııalardy paıdalaný múmkindikterin taldaýdyń mańyzy zor», – dedi Máýlen Áshimbaev.
Sonymen qatar Senat tóraǵasy 2021 jyly ulttyq jasandy ıntellekt platformasynyń jumys isteýine baılanysty zańnamalyq deńgeıde bazalyq normalar engizilgenin tilge tıek etti. Atap aıtqanda, Aqparattandyrý týraly zańda ulttyq jasandy ıntellekt platformasy operatorynyń quzyreti aıqyndalǵan.
Budan basqa, mınıstrlik Jasandy ıntellektini damytýdyń 2024-2029 jyldarǵa arnalǵan tujyrymdamasyn ázirlep jatyr.
«Memleket basshysy zań shyǵarý qyzmetin tsıfrlandyrýdy tapsyrǵany belgili. Osyǵan baılanysty Parlament Palatalarynda tıisti jumystar júrgizilip jatyr. Qazirdiń ózinde naqty nátıjeler bar. Tsıfrlyq strategııanyń jobasy ázirlendi. «E-Parlament» jobasy da iske asyryla bastady. Aldaǵy ýaqytta osy iste bárimiz birlesip áreket etýimiz kerek. Senat jasandy ıntellektini damytý úshin qajetti quqyqtyq orta qalyptastyrýǵa járdemdesýge daıyn. Osy baǵyttaǵy tıisti jobalar boıynsha birlesip jumys isteıik», – dedi Senat spıkeri.
Otyrys barysynda Data-Management salasyndaǵy tsıfrlyq sheshimderdi reınjınırıngteý, zań shyǵarý úderisiniń qazirgi jaı-kúıi men tsıfrlandyrý máseleleri, sondaı-aq zań shyǵarý salasyndaǵy startaptardyń jalpy trendteri de talqylandy.
Odan bólek, is-sharada Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın, Tsıfrlyq úkimetti qoldaý ortalyǵynyń tóraǵasy Rústem Bıǵarı, «Ulttyq aqparattyq tehnologııalar» AQ-nyń tóraǵasy Rostıslav Konıashkın, Ádilet vıtse-mınıstri Bekbolat Moldabekov, «Astana Hub»-tyń bas dırektory Maǵjan Mádıev, «Bizdin.ai» kompanııasynyń bas dırektory, Aıbek Nurtazaev, TAG Consulting-tiń basqarýshy seriktesi Valerıı Gorlachev, Parlamentarızm ınstıtýtynyń dırektory Qanatbek Safınov jáne taǵy basqa sarapshylar men memlekettik organdardyń ókilderi sóz sóılep, jasandy ıntellekt salasyndaǵy jobalaryn tanystyrdy.
