Senatorlar Mańǵystaýdaǵy kásiporyndardy aralady
Qazaqstan Parlamenti Senatynyń birqatar depýtaty Mańǵystaýǵa jumys saparymen kelip, óndiristik kásiporyndardy aralady. Kezdesý barysynda ınnovatsııalyq damý baǵdary, shaǵyn nemese orta bıznes órisin keńeıtý máseleleri talqylandy, dep habarlaıdy QazAqparat tilshisi.
Senatorlar «Caspi Bitum» BK» JShS, «Aqtaý teńiz saýda porty» UK» AQ, «Chem-Invest Export» JShS, «Topan Chemical Industries» JShS jáne «Caspian Safety Group» JShS mekemelerin aralady.
Aldymen «CASPI Bitum» zaýyty jumysymen tanysty. Zaýyt jylyna 500 myń tonna bıtým óndirip, jylyna 1 mln tonna munaı óńdeıdi. Qazir 214 adamdy jumyspen qamtyp otyr. 2021 jyly totyǵý blogy jańǵyrtyldy, bul bıtým shyǵymdylyǵyn 50% - ǵa (+10%) deıin arttyrýǵa múmkindik berdi.
«Mańǵystaý oblysyna issapardyń maqsaty – Memleket basshysynyń Joldaýynan týyndaǵan kóliktik-logıstıkalyq ınfraqurylymdy damytý máselelerin talqylaý. Qazaqstanda 95 myń shaqyrymǵa jýyq jol bolsa, onyń 26%-y respýblıkalyq deńgeıde. Al qalǵany, oblystyq jáne aýdandyq deńgeıdegi joldar. Aldaǵy ýaqytta 4000 shaqyrymǵa deıin jóndeý josparlanǵan. Sondaı-aq Caspi Bitum máselesi nazarǵa alynatyn bolady. Osyǵan oraı, qazir zaýyt 500 myń tonnaǵa jýyq munaı shyǵarsa, al aldaǵy eki jylda onyń kólemin 750 myń tonnaǵa arttyrý kózdelgen», - dedi depýtat Álibek Náýtıev.
Senatorlar aıaldaǵan ekinshi núkte – Aqtaý teńiz porty. Port 24 saǵat boıy qurǵaq júkterdi, shıki munaı men munaı ónimderin tasymaldaıdy. «Aqtaý teńiz porty» AEA» AQ basqarma tóraǵasy Ashat Qabashevtiń aıtýynsha, porttaǵy basty máseleniń biri – port aýmaǵyn keńeıtý.
«Jańaózen aýmaǵynan arnaıy jobalardy júzege asyrý úshin 274 gektar jer alý qarastyrylyp jatyr. Osy oraıda, óńirimizge arnaıy kelgen senatorlarǵa alǵys bildiremin», - dedi Ashat Qabashev.
Sonymen birge, senatorlar «Caspian Safety Group» tigin tsehynyń jumysymen tanysty. Munaıly aýdany Qyzyltóbe aýylynda ornalasqan tseh jumysyn 2022 jyly bastaǵan.
«Bul mekemede 50 jumysshy qyzmet etedi. Arnaıy jumysshylarǵa shamamen aıyna 2000 túrli kıim tigiledi. Bizdiń kıimder kóbine munaı kompanııalaryndaǵy qyzmetkerlerge arnalǵan», - dedi «Caspian Safety Group» tigin tsehiniń bas dırektory Kýdarov Qorǵanbek.
