Senatorlar kásipkerlerge qatysty zań jobasyn qaraıdy
ASTANA. KAZINFORM - Senat spıkeri Máýlen Áshimbaevtyń tóraǵalyǵymen palata bıýrosynyń otyrysy ótti. Onda 29 aqpan kúni bolatyn Senat otyrysynyń kún tártibi bekitildi.
Soǵan sáıkes aldaǵy beısenbide senatorlar «Qazaqstan Respýblıkasynyń keıbir zańnamalyq aktilerine bıznes júrgizý máseleleri boıynsha ózgerister men tolyqtyrýlar engizý týraly» zańdy ekinshi oqylymda qaraıdy. Bul zań kásipkerlik qyzmet salasyndaǵy zańnamany jetildirý jáne bıznesti damytý úshin qolaıly jaǵdaılar jasaý maqsatymen ázirlengen.
Qujat normalary memlekettik baqylaý men qadaǵalaý nysandaryn retke keltirýge, kásipkerlik qyzmetti júrgizýge jáne damytýǵa arnalǵan jaǵdaılardy jaqsartýǵa, Memleket basshysynyń jekelegen tapsyrmalaryn iske asyrýǵa arnalǵan.
Sonymen qatar Senat otyrysynda «Halyqaralyq sý aǵyndaryn keme qatynasynan basqasha paıdalaný túrleriniń quqyǵy týraly konventsııany ratıfıkatsııalaý týraly» zań qaralady. Konventsııa – jer ústi jáne jer asty sýlaryn ádil jáne turaqty basqarýǵa yqpal etýdiń jahandyq quqyqtyq tetigi. Olardyń bólikteri ártúrli memleketterde kezdesetinin atap ótken jón.
Sondaı-aq «2014 jylǵy 23 jeltoqsandaǵy Eýrazııalyq ekonomıkalyq odaq sheńberinde medıtsınalyq buıymdar (medıtsınalyq maqsattaǵy buıymdar men medıtsınalyq tehnıka) aınalysynyń biryńǵaı qaǵıdattary men qaǵıdalary týraly kelisimge ózgeris engizý týraly hattamany ratıfıkatsııalaý týraly» zań da Palata otyrysynyń kún tártibine shyǵaryldy. Atalǵan qujat tıisti saladaǵy zańnamany jetildirýge baǵyttalǵan.
Odan bólek, Bıýro otyrysynda Májilisten kelip túsken zańdar Senattyń turaqty komıtetterine bólinip berildi.
