Senator shekarashylardyń jumysyna tıisti jaǵdaı jasaýdy surady
Depýtattyń sózine qaraǵanda, 251 shekara bólimshesiniń tek 106-sy tıptik keshende, al 145-i sý, gaz jáne elektr qýatyna qatysty problemalary bar beıimdelgen ǵımarattarda ornalasqan. Osy oraıda shekara qyzmetinde júrgizilip jatqan reformalar men áskerı qyzmet ótkerýdiń jaǵdaıyn jaqsartý boıynsha atqarylǵan jumystarǵa qaramastan, bul problemalar shekarashylardyń moraldyq-psıhologııalyq jaǵdaıyna áser etip otyr.
Osy máselelerdi sheshý úshin 2020 jyly tıisti Jol kartasy qurylyp, memlekettik saraptamadan ótken jobalaý-smetalyq qujat jasaldy. Alaıda bul máseleler áli sheshimin tapqan joq. Senator bul turǵyda elimizdiń shekarasyn qorǵaýǵa úles qosyp júrgen shekarashylardyń jaǵdaıyn jaqsartýdy surady.
«Memlekettik shekara qyzmetteriniń materıaldyq-tehnıkalyq bazasy men áleýmettik nysandaryn arnaıy Úkimettik komıssııa aıasynda tekserýdi, «Jol kartasyna» engizilgen shekara basqarmasynyń ǵımarattary men nysandaryna qatysty jergilikti atqarýshy organdardyń jumysyn qaıta qaraýdy jáne shekarashylardyń áleýmettik-turmystyq jaǵdaıyn tıisti baǵdarlamalyq qujattar aıasynda jaqsartý jumystaryn jedeldetip iske asyrýdy qamtamasyz etýdi usynamyn», - dedi Janbolat Jórgenbaev Premer-Mınıstr Álıhan Smaıylovtyń atyna joldaǵan depýtattyq saýalynda.
Budan buryn habarlanǵandaı, búgin Senattyń jalpy otyrysynda «Qazaqstan Úkimeti men Qyrǵyzstan Úkimeti arasyndaǵy shekaralyq ókilderdiń qyzmet ýchaskeleri týraly hattamany ratıfıkatsııalaý týraly» Zań maquldandy.
