Senator: BJZQ salymshylarynyń múddesin qorǵaı almaı jatyrmyz

ASTANA. KAZINFORM – Parlament Senaty Qarjy jáne bıýdjet komıtetiniń tóraǵasy Sultanbek Mákejanov Ulttyq bank ókilderin BJZQ salymshylarynyń múddesin negizgi basym baǵytqa qoıýǵa shaqyrdy.

- Taqyrypta jalǵasaq, Ulttyq bankke qarsy ýáj aıtqym keledi. Batys elderimen bizdi salystyrý sonshalyq durys emes shyǵar. Siz aıtyp otyrǵan jahandyq zeınetaqy ındeksinde ınvestıtsııalardyń aqylǵa qonymdylyǵy boıynsha 41 orynda turmyz. Jyldar bederinde qarasaq, bul kórsetkish jyldan-jylǵa nasharlap otyrǵan. Bul máseleni ókiletti organ da jyly jaýyp keledi. Nege nasharlap jatyr? Soǵan qaramastan Eýropa elderine qaraǵanda jaǵdaıymyz jaqsy dep qoıamyz. Bul jerde oılanatyn dúnıe barshylyq, áriptester. Byltyr salǵan 1,5 trln teńge týraly aıtqanda el ekonomıkasyna ınvestıtsııa salýǵa eshkim tyıym qoımaǵany túsinikti. Biraq salymshylardyń múddesin qorǵaýǵa da eshkim tyıym qoıǵan joq. Bastysy osy, - dedi ol.

Senat depýtaty BJZQ aqshasy tıimdi jumsalyp jatyr degen málimetke kúmánmen qaraıtynyn aıtty.

- Ulttyq banktiń 1,5 trln teńgeni «Samuryq Qazyna» men «Báıterek» arqyly tıimdi shyǵardyq degen ustanymymen kelise almaımyn. 300 mlrd teńgeni agroónerkásip keshenine salyp, bul óte jaqsy salym boldy dep qalaı aıtýǵa bolady? Biz ol salada ne bolyp jatqanyn bilemiz. Rasymen agrarlarǵa kómektesip jatqan shyǵarmyz, biraq salymshylardyń múddesin qorǵaı almaı jatyrmyz, - dedi Sultanbek Mákejanov.

Buǵan deıin Ulttyq bank tóraǵasynyń orynbasary Aqyljan Baımaǵambetov Biryńǵaı jınaqtaýshy zeınetaqy qorynyń aqshasy qandaı jobalarǵa ınvestıtsııalanatynyn aıtqan edi.