Senator aýyl sharýashylyǵy kooperatıvteriniń negizgi problemasyn atady
Qazaqstandyq agrarshylar aýyl sharýashylyǵy salasynda 3 284 kooperatıv qurǵan bolatyn. Alaıda, is júzinde bul birlestikterdiń 60 paıyzy tólem qabiletsiz nemese áreketsiz turǵany anyqtaldy. Senator Janbolat Jórgenbaev óziniń depýtattyq saýalynda osy máseleni kóterdi, dep habarlaıdy Kazinform.
Depýtattyń aıtýynsha, bastapqy kapıtaldyń bolmaýy kooperatıvterdiń negizgi problemasyna aınaldy. ıAǵnı, «áýeli nesıe alyp, sodan keıin kooperatıvke kirý» kontseptsııa jumys istemeı tur.
Senator bıyl «Aýyl amanaty» baǵdarlamasy aıasynda 400 aýyl sharýashylyǵy kooperatıvi qurylǵanyn aıta kelip, olardyń jumys isteýi úshin 100 mıllıard teńge bólingenine toqtaldy. Sonymen qatar, «Agrarlyq nesıe korporatsııasy» 543 aýyl sharýashylyǵy kooperatıvine taǵy qosymsha 370 mıllıard teńge bóldi. Alaıda eldegi 268 000 ferma men 1,5 mıllıonnan astam jeke qosalqy sharýa qojalyǵy áli kúnge deıin aýylsharýashylyq kooperatıviniń qyzmetine qosylmaı otyr.
«Osy atalǵan qurylymdar arasynda irilendirý baǵytyndaǵy jumystyń álsiz júrip jatqanyn baıqatty. Birinshiden, nasıhat jumysy tıisti deńgeıde jasalmaı otyr jáne «Aýyl amanaty» baǵdarlamasynyń múmkindikteri tolyq ashylmaǵan. Ekinshiden, jer qatynastaryn retteýdiń keıbir máseleleri tolyq qarastyrylmaǵan. Úshinshiden, kooperatıv pen onyń músheleri úshin salyq salý máseleleri tolyq rettelmegen. Tórtinshiden, kásipkerlik sýbektileriniń ónimdi saqtaýǵa arnalǵan qoımalardyń joqtyǵy, óńirlerde saýda-logıstıkalyq ortalyqtar máselesiniń sheshilmegendigi problemaǵa aınaldy», - dedi Janbolat Jórgenbaev.
Senator osy aıtylǵandardy tujyrymdaı otyryp, elimizdiń Úkimetine birqatar usynys aıtty.
«Aýyl sharýashylyǵy kooperatsııasyn damytý jumystaryn júıelendirý úshin Úılestirý keńesi qurylýy tıis. Osyǵan baılanysty «Aýyl sharýashylyǵy kooperatıvteri týraly» zańyna birqatar ózgeris engizý mańyzdy. Sonymen qatar, Salyq zańnamasyn jetildirý aıasynda kooperatıvke jáne onyń múshelerine qosarlanǵan salyq salýdy alyp tastaýdy qarastyrý kerek. Aýyl sharýashylyǵy kooperatıvteriniń kólik shyǵystaryn sýbsıdııalaý boıynsha usynystardy qarastyrý mańyzdy», - dedi depýtat.
