Senator: Ata zańnan birneshe norma alyp tastalady
ASTANA. KAZINFORM – Senat depýtaty Nurlan Beknazarov Konstıtýtsııalyq reforma jónindegi komıssııanyń ekinshi otyrysynda bir palataly Parlamentke kóshý Ata zańnyń birneshe babynyń kúshin joıatynyn aıtty.
- Bir palataly Parlamentke ótýge baılanysty Konstıtýtsııadaǵy Parlament bóliminiń birqatar babyna onyń qurylýy, saılanýy, quzyrettik ókilettigi, zań qabyldaý protsesteri men quramyna qatysty mańyzdy ózgerister engizý kózdelgen. Birqatar baptyń tutastaı alynyp tastalýy da aıqyndalyp otyr, - dedi ol.
Onyń sózinshe, Quryltaı Qazaqstan Respýblıkasynyń zań shyǵarý bıligin júzege asyratyn eń joǵary ókildi bılik organy bolyp bekitilmek.
- Quryltaıdyń ókilettiligi onyń birinshi sessııasy ashylǵan kezden bastalady jáne jańadan saılanǵan Quryltaıdyń birinshi sessııasynyń jumysy bastalǵan kezde aıaqtalady. Quryltaıdyń ókilettigi Konstıtýtsııada kózdelgen jaǵdaılarda jáne tártippen merziminen buryn toqtatylýy múmkin. Quryltaıdyń uıymdastyrylýy men qyzmeti, onyń depýtattarynyń quqyqtyq jaǵdaıy Konstıtýtsııalyq zańda aıqyndalady. Usynystarǵa sáıkes, quryltaı Konstıtýtsııalyq zańdarda belgilengen tártippen birtutas jalpyulttyq saılaý okrýginiń aýmaǵy boıynsha proportsıonaldy ókildik etý júıesi negizinde saılanatyn 145 depýtattan jasaqtalady, - dedi ol.
Sondaı-aq, ol Quryltaı depýtattarynyń ókilettik merzimin 5 jyl dep bekitý usynylǵanyn eske saldy.
- Quryltaı depýtattarynyń kezekti saılaýyn jumys istep turǵan shaqyrylym ókilettiginiń merzimi aıaqtalardan keminde eki aı buryn ótkizý kózdelgen. Al kezekten tys saılaý Quryltaı ókilettiligi merziminen buryn toqtatylǵannan kúnnen bastap eki aı merzim ishinde ótkiziledi. Qazaqstan Respýblıkasynyń azamattyǵy bar, onyń aýmaǵynda sońǵy 10 jylda turaqty turyp jatqan, 25 jasqa tolǵan tulǵa Quryltaı depýtaty bola alady dep usynylyp otyr. Quryltaı depýtattyǵyna kandıdattarǵa qosymsha talaptar jeke Konstıtýtsııalyq zańda belgilenedi, - dedi Nurlan Beknazarov.
Aıta ketý kerek, bul aıtylyp otyrǵan normalardyń bári ázirge usynys qana. Normalardyń qaısysy qabyldanyp, qaısysy Ata zańǵa enbeıtinin referendým sheshedi.
Dál qazir Konstıtýtsııalyq reforma jónindegi komıssııanyń ekinshi otyrysy ótip jatyr.
Kazinform agenttiginiń qazaq jáne orys tilindegi Telegram arnasynda mátin translıatsııasy bolady.
Ótken aptada Konstıtýtsııalyq komıssııanyń alǵashqy otyrysy ótip, bir palataly «Quryltaıdyń» fýnktsııasy men quramy, vıtse-prezıdent laýazymynyń memlekettik bıliktegi orny, zań shyǵarý bastamasyn kóterýge haqyly «Halyq keńesiniń» quzyreti qandaı bolatyny aıtylǵan edi.
Halyq keńesine zań shyǵarýǵa bastama jasaý quqyǵyn engizý qoǵamdyq qatynastar men aımaqtardyń damýyna, azamattardyń ál-aýqatyn arttyrýǵa qatysty mańyzdy bastamalardy jedel sheshýge yqpal etetin zańnamalyq qoldaýdy qamtamasyz etip, ózara is-qımyldyń tıimdiligin arttyrady dep josparlanǵan.