Senator «ART Sport» baǵdarlamasyndaǵy kemshilikterdi atady
ASTANA. KAZINFORM — Senator Gennadıı Shıpovskıh óziniń depýtattyq saýalynda bıýdjet qarjysynyń tıimsiz jumsalýy, sport ınfraqurylymynyń talapqa saı kelmeýi, «ART Sport» memlekettik baǵdarlamasynyń tıisti júıeli baqylaýynyń bolmaýy máseleleri týraly aıtyp berdi.
Depýtattyń sózine qaraǵanda, «ART Sport» baǵdarlamasy buqaralyq sportty damytý jáne balalardy tegin sektsııalar men úıirmelerge tartý úshin iske qosylǵan. Alaıda iske asyrý barysynda kúrdeli máselelerge tap bolypty.
Senator qarjy alaıaqtyǵy derekterin alǵa tarta otyryp, keıbir kásipkerler balalardy atústi tirkegeni jáne sabaq ótkizbegenimen qosa, qarjysynan bas tartpaǵanyn jaıyp saldy. Balalardyń sabaqqa qatysýyn rastaıtyn elektrondyq júıe bolmaǵandyqtan, jalǵan málimetter usynylyp, bıýdjetten artyq qarjy alǵany anyqtalǵan. Kóptegen sporttyq nysandarda ystyq sý, dýsh, aýa jeldetkishi, órt qaýipsizdigi júıeleri joq.
Oqý-jattyǵýǵa qajet qural-jabdyqtar jetispeıdi. Jattyqtyrýshylardyń biliktiligi tómen, olardyń kópshiligi tıisti sertıfıkattarǵa ıe emes.
Sonymen qatar aýyldyq jerlerde sport sektsııalary jetkiliksiz, al balalar iri qalalarǵa qatynaı almaıdy jáne qarjylandyrý tetikteriniń jetildirilmeýi saldarynan keıbir óńirlerde baǵdarlama jartylaı nemese tolyq toqtap qalǵan. Máselen, osyndaı zań buzý derekteri Almaty, Aqtóbe, Túrkistan, Pavlodar oblystarynda tirkelgen.
- 2022-2023 jyldary baǵdarlama aıasynda túrli zań buzý derekteri boıynsha 38 prokýrorlyq qadaǵalaý aktisi engizilip, 43 laýazymdy tulǵa tártiptik jaýapkershilikke tartyldy. 600-den astam kásipkerdiń quqyǵy qorǵalyp, olarǵa tıesili qarajat qaıtaryldy. Sondaı-aq, 22 qylmystyq is qozǵalyp, 8 adam sottaldy. Eń soraqysy – respýblıka boıynsha is júzinde sabaqqa qatyspaǵan 8 myńnan astam balanyń tirkeýi belgili boldy. Sonymen birge, 164 sektsııa sanıtarlyq talaptarǵa saı kelmeıtin jertólelerde, páterlerde jáne jabdyqtalmaǵan zaldarda ótkizilgen. Baǵdarlamanyń sapasyn baqylaý tetikteriniń joqtyǵy onyń negizgi maqsatyna qol jetkizýge múmkindik bermegen, - dedi Gennadıı Shıpovskıh Úkimet basshysynyń atyna joldaǵan saýalynda.
Depýtat osyǵan baılanysty Úkimetti birqatar túzetý engizýge shaqyrdy. Atap aıtqanda, memlekettik sport salasynda tapsyrysty qarjylandyrýdy aýdandyq jáne qalalyq deńgeılerge berý, bul úlken ıkemdilik pen ashyqtyqty qamtamasyz etedi. Sondaı-aq, jalǵan tirkeýler men teris áreketti boldyrmaý úshin qatysýdy esepke alýdyń bıometrııalyq júıesin engizý usynyldy.
Senator balalardy turǵylyqty jeri boıynsha sektsııaǵa ádil bólý jáne sport ınfraqurylymyna qoıylatyn talaptardy qatańdatýdyń mańyzdylyǵyn atap ótti.
Eske salsaq, byltyr kúzde Sybaılas jemqorlyqqa qarsy is-qımyl agenttiginiń resmı ókili Danııar Bıgaıdarov «Artsport» baǵdarlamasyna bólingen qarjyny jymqyrý kúdigine ilikkenderge qatysty sotqa deıingi tergeý amaldarynyń aıaqtalǵanyn aıtty.