Senator altyn óndirý salasyndaǵy zańsyzdyqtardy jarııalady
Altyn óndirýshiler hımııalyq reagentterdi qoldanyp, ekojúıeni buzdy, zańdar men erejelerdi saqtamaı keledi. Senator Darhan Qydyráli óziniń depýtattyq saýalynda altyn izdeýshilerdiń tabıǵatqa qalaı zııan keltirgenin jáne adamdardyń ómir súrý jaǵdaıyn nasharlatyp jatqany týraly másele kóterdi, dep habarlaıdy Kazinform.
Depýtat Túrkistan oblysynyń Abaı aýylynyń 127 turǵyny qol qoıǵan ujymdyq hat problemany kóterýge sebep bolǵanyn atap ótti. Azamattardyń ótinishinde 2019-2023 jyldar aralyǵynda Kókbulaq kentindegi Qaıyrshaqty ózeninde kompanııalardyń biri altyn óndirý úshin geologııalyq barlaýmen aınalysqany jazylǵan. Olardyń jumysynan keıin ózen qazir ekologııalyq apat jaǵdaıyna ushyraǵan.
Senatordyń aqparatyna qaraǵanda, dál osy kompanııa qazir Úlken jáne kishi Kókbulaq ózenderinde geologııalyq barlaý jumystaryn júrgizýge nıettenip otyrǵan kórinedi. Aımaq turǵyndary osydan keıin dabyl qaǵyp, ekologııalyq apatqa qatysty jaǵdaı qaıtalanady dep qaýiptenip otyr.
«Shyǵys Qazaqstan, Aqmola, Almaty, Jetisý, Jambyl oblystarynda osyndaı jaǵdaılardyń bolǵanyn baspasózden jaqsy bilemiz. Máselen, Shyǵys Qazaqstan oblysynda altyn izdeýshiler Qulynjon ózeniniń arnasyn ózgertken. Lıtsenzııalarynda kórsetilgen shekteýlerden asyp ketken nemese tipti, arnaıy ruqsaty, bilikti mamany joq ońaı olja izdeýshiler ekologııalyq talaptardy eskermeıdi. Qazba baılyqtaryn barlaýda jańa tehnologııalar qoldanylmaıdy. Esesine, zańsyz jer qoınaýyn óndirýshiler jabaıy jolmen taý-tasty talqandap, býldozer, greıderlermen ózenderdiń astań-kesteńin shyǵarady. Halyq sý iship otyrǵan ózenderge túrli hımııalyq reagentter qoldanady», — dedi senator.
Darhan Qydyráli Úkimet pen Bas prokýratýra basshylaryn Joldaýda kórsetilgen geologııalyq barlaý jumysyn júrgizý jónindegi tapsyrmanyń sapaly oryndalýyna baqylaýdy kúsheıtýge shaqyrdy.
Depýtat spýtnık arqyly monıtorıng júrgizý, mıneraldy resýrstardyń tsıfrlyq kartasyn daıyndaý sııaqty jańa tehnologııalardy paıdalanýdy, sala mamandaryn sapaly daıarlaý men jer qoınaýyn paıdalanýshylardyń qyzmetine baqylaýdy kúsheıtýdi jáne zańdy buzǵandardy jazalaýdy surady.
