Senator Almatynyń jylytý kezeńine daıyndyǵymen tanysty

ALMATY. QazAqparat - Senator Sultanbek Mákejanov Almaty qalasyna sapary aıasynda №2 jylý elektr ortalyǵynda, «Orbıta» aýdandyq qazandyǵy aýmaǵynda jáne «Almaty jylý jelileri» nysandaryn salý jáne jańǵyrtý alańdarynda boldy, dep habarlaıdy QazAqparat.

Depýtat jylý jelileri men jabdyqtardyń aldaǵy qysqy maýsymǵa daıyndyq jumysynyń barysy týraly habardar boldy. Oǵan sondaı-aq negizgi energııa kózderiniń jabdyqtaryn jóndeý kestesi boıynsha júrgizilip jatqan jumystar da tanystyryldy.

Depýtat Almaty qalasyndaǵy qaramaǵyna №1, №2 jylý elektr ortalyqtary men batys jylý kesheni jáne Kaskad elektr stansasy kiretin «AlES» AQ-nyń negizgi qýat kózderi jabdyqtaryn 2023 jylǵy jóndeý kestesimen de tanysty. Mundaǵy energetıkalyq, sý jylytý, bý qazandyqtary men týrbo jáne gıdroagregat jabdyqtardyń jalpy sany 56 bolyp otyr.

«Memleket basshysy 2022 jylǵy jeltoqsanda QR Úkimetiniń keńeıtilgen otyrysy kezinde Úkimetke energııa nysandary men jylý jelilerin jóndeý mindetterin sheshýdi tapsyrǵan bolatyn. Prezıdenttiń tapsyrmasyna sáıkes, memlekettik menshiktegi energetıka nysandary bıýdjet esebinen jóndelýi tıis. Jekemenshik nysandar «Tarıfti ınvestıtsııaǵa aıyrbastaý» baǵdarlamasy boıynsha óz esebinen jańǵyrtylady. Úkimet bul mindetti jedel túrde sheshýge kirisýi kerek», - dedi senator Sultanbek Mákejanov.

Depýtat energetıkalyq keshendi damytý jónindegi Úkimetpen birge júrgizilip jatqan jumystar týraly da aıtyp berdi.