Senatqa balalardy kıberbýllıngten qorǵaý týraly zańǵa qatysty 26 usynys túsken

NUR-SULTAN. QazAqparat – Balalardy kıberbýllıngten qorǵaý týraly zań jobasyna qatysty qoǵam men halyqaralyq uıymdar ókilderinen 26-dan astam usynys túsken. Bul týraly Senat depýtaty Beıbit Isabaev aıtyp berdi, dep habarlaıdy QazAqparat.

«Bizdiń komıtettiń múshesi Dınara Nóketaeva jumys tobymen birge zań jobasyn qaraý barysynda qoǵam men halyqaralyq uıymdar ókilderinen 26-dan astam usynys túskenin aıtty. Bul túzetýlerdiń barlyǵy qoǵamnyń, azamattyq sektordyń talaptaryna tikeleı baılanysty. Biz olardyń pikirin eskerdik», - dedi Beıbit Isabaev Senattyń jalpy otyrysynan keıin tilshilerge bergen suhbatynda.

Depýtattyń aıtýynsha, qoǵam tarapynan túrli reaktsııa týdyrǵan normalardyń barlyǵy alynyp tastaldy.

Sonymen birge, senator Qazaqstannyń memlekettik organdarymen ózara is-qımyl jasaý úshin ınternet-resýrstardyń resmı ókiliniń bolýy týraly normany túsindirdi.

«Resmı ókilderin anyqtaý úshin Qazaqstannan tys jerlerde ornalasqan baspagerlermen, zamanaýı ınternet-resýrstardyń ıelerimen kelisim jasaý týraly tarmaq bar. Biraq bul resmı ókilderdiń Qazaqstan aýmaǵynda bolýy mindetti emes. Eń bastysy, resmı ókil táýliktiń kez kelgen ýaqytynda Qazaqstannyń qoldanystaǵy zańnamasyn saqtaý máseleleri, onyń ishinde balalarǵa qatysty kıberbýllıng máseleleri boıynsha Qazaqstannyń ýákiletti organymen ózara is-qımyl jasaýy tıis», - dedi depýtat.

Eske sala ketsek, búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine balanyń quqyqtaryn qorǵaý, bilim berý, aqparat jáne aqparattandyrý máseleleri boıynsha ózgerister men tolyqtyrýlar engizý týraly» zań jobasy eki oqylymda qaraldy. Qujatqa túzetýler engizilgendikten zań jobasy Májiliske qaıtaryldy.

Buǵan deıin Beıbit Isabaev zańǵa engizilgen naqty 4 túzetýdi túsindirgen edi.