Senat jasandy ıntellekt týraly zańdy Májiliske qaıtardy
ASTANA. KAZINFORM — Búgin Senattyń jalpy otyrysynda «Jasandy ıntellekt týraly» Zańy men ilespe qujat qaraldy. Senat qujattyń jekelegen baptaryn jańa redaktsııada usynyp, ony Májiliske qaıtardy.
Bul zańdar tsıfrlandyrý protsesterin retteý, jasandy ıntellektini qaýipsiz engizý jáne qoldanystaǵy zańnamany jetildirý úshin zamanaýı quqyqtyq bazany qalyptastyrýǵa baǵyttalǵan.
— Búgingi tańda jasandy ıntellekt, úlken derekter, blokcheın sııaqty zamanaýı tehnologııalar ınstıtýttardyń tıimdiligin arttyryp qana qoımaı, ashyqtyq, ınklıýzııa jáne turaqty ekonomıkalyq ósý úshin jańa múmkindikter ashady. Qazirgi ýaqytta bul salada 11 óńirde 27 ýnıversıtet pen 6 ǵylymı ınstıtýt belsendi jumys istep otyr, zertteýlerge 479 ǵalym jumyldyrylǵan. Bul sala boıynsha 62 joba iske asyrylyp jatyr. Jasandy ıntellektini engizý normatıvtik bazasyz múmkin emes. Negizgi zań Qazaqstanda alǵash ret jasandy ıntellekt tehnologııalaryn retteý úshin quqyqtyq negiz quraıdy. Ol jasandy ıntellektini qaýipsiz jáne etıkalyq engizýdi qamtamasyz etýge, jeke tulǵalardyń quqyqtary men bostandyqtaryn qorǵaýǵa, sondaı-aq ınnovatsııalyq damýdy yntalandyrýǵa baǵyttalǵan, — dedi senator Bıbigúl Aqqojına.
Budan basqa, zańda adam men qoǵamdy yqtımal qaýipti tehnologııalardan qorǵaýǵa baǵyttalǵan qatań shekteýler bar ekenin atap ótken jón.
— Sonymen qatar, zańǵa qoldanystaǵy zańnamaǵa sáıkes keltirýge baǵyttalǵan ózgerister men tolyqtyrýlardy kózdeıtin birqatar túzetý qabyldandy. Máselen, jaýapkershilikti saqtandyrýdyń erikti túrin qoldanýdy alyp tastaý qarastyrylyp otyr. Qazaqstan Respýblıkasynyń zańdaryna sáıkes erikti túrde saqtandyrýmen qatar, jasandy ıntellekt júıeleri keltirgen zııan úshin jaýapkershilikti jáne olardy paıdalanýǵa baılanysty táýekelderdi mindetti túrde saqtandyrýdy qoldaný usynylady. Budan basqa, Májilis qabyldaǵan zańda táýekelder anyqtalǵan jaǵdaıda nuqsandy barynsha azaıtý jónindegi is-qımyldarmen shektelý kózdelgen. Túzetýge sáıkes, jasandy ıntellekt júıeleriniń ıeleri men ıegerleri mundaı qaterlerdi bolǵyzbaý úshin nuqsandy da boldyrmaýǵa baǵyttalǵan jedel sharalar qabyldaýy kerek, — dedi depýtat.
Osy oraıda senatorlar «Jasandy ıntellekt týraly» jáne «Qazaqstan Respýblıkasynyń keıbir zańnamalyq aktilerine jasandy ıntellekt jáne tsıfrlandyrý máseleleri boıynsha ózgerister men tolyqtyrýlar engizý týraly» zańdarynyń jekelegen baptaryn maquldamaı, atalǵan baptardyń jańa redaktsııasyn usyna otyryp, zańdardy Májiliske qaıtarý jóninde sheshim qabyldady.
Budan buryn habarlanǵandaı, 5 jyl ishinde Qazaqstanda 1 mln azamatty jasandy ıntellekt negizderine oqytý josparlanýda. Elimizdiń 20 joǵary oqý ornynda tıisti bilim berý baǵdarlamalary engizildi.