Senat ýran óndirý salasyna qatysty qujatty Májiliske qaıtardy
Zań jobasy Qazaqstan Respýblıkasynyń ýran óndirý salasyndaǵy zańnamasyn jetildirý maqsatynda ázirlendi.
«Zań jobasy Senat komıtettiń keńeıtilgen otyrysynda ekinshi oqylymda qaraldy. Qujat elimizdegi ýran óndirý salasyn quqyqtyq retteýdi jetildirýge baǵyttalǵan. Memleket basshysynyń bıylǵy 26 qańtarda Úkimettiń keńeıtilgen otyrysynda memlekettik jáne jeke operatorlardy qurýǵa tyıym salý jónindegi bergen tapsyrmasyn oryndaý maqsatynda Senat depýtattary zań jobasynyń birinshi babynyń besinshi tarmaqshasynyń 14,15,16,17,18-shi jáne 19-shy abzatsty alyp tastaýdy usynyp otyr. Úkimettiń bıylǵy 17 aqpanda kelgen qorytyndysyna sáıkes, bul usynys qoldaý tapty. Zań jobasyndaǵy barlyq túzetýler ýran salasyndaǵy karym-qatynastardy ári qaraı jetildirýge baǵyttalǵan. Sondyqtan, zań jobasynyń bastamashylaryna, Parlament Májilisiniń depýtattaryna alǵysymyzdy bildiremiz», - dedi senator Baýyrjan Qanıev.
Baıandalǵandy eskere kele, Senattyń Ekonomıkalyq saıasat, ınnovatsııalyq damý jáne kásipkerlik komıteti Parlament Májilisi maquldaǵan «Jer qoınaýy jáne jer qoınaýyn paıdalaný týraly» Qazaqstan Respýblıkasynyń Kodeksine ýran óndirý máseleleri boıynsha ózgerister men tolyqtyrýlar engizý týraly» Zań jobasyna ózgeristi Konstıtýtsııanyń 61-babynyń 5-tarmaǵyna sáıkes Parlament Májilisine jiberýdi usynady.
Sheshim qabyldaý barysynda palata depýtattary bul usynysqa qoldaý bildirdi.
Budan buryn habarlanǵandaı, qujat boıynsha geologııalyq qorlardy esepteý jónindegi esepke sáıkes bastapqy qorlardan otyz jáne odan da kóp paıyzdan asatyn ýran ken orny qorlary ósiminiń kólemderi bolǵan kezde ýran óndirýge arnalǵan kelisimshartta óńirdiń áleýmettik-ekonomıkalyq damýyna baǵyttalǵan jobany iske asyrý jónindegi qosymsha mindettemelerdi belgileý týraly talaptar engiziledi.
Bul qujat bir top Parlament depýtatynyń bastamasymen ázirlengenin aıta ketken jón.
