Senat tóraǵasy: Jastar «Eldiktiń jeti tuǵyryn» tý etýi kerek

NUR-SULTAN. QazAqparat – «Táýelsizdik urpaqtary» atty respýblıkalyq jastar forýmynda QR Palamenti Senatynyń tóraǵasy Máýlen Áshimbaev Elbasy usynǵan «Eldiktiń jeti tuǵyry» atty tujyrymdamanyń mańyzyna toqtaldy, dep habarlaıdy QazAqparat tilshisi.

«Kúni keshe Elbasymyz Nur Otan partııasy saıası keńesiniń otyrysynda táýelsizdigimizdi nyǵaıtýdyń mańyzdy mindetterin atap, «Eldiktiń jeti tuǵyry» atty tujyrymdamany jarııalady. Táýelsizdikti, birlikti, ata-babadan mıras bolǵan jerdi, otbasylyq qundylyqtar men salt-dástúrdi, ulttyq mádenıetti saqtaýdyń mańyzyna toqtaldy. Sondaı-aq Elbasymyz bilim men pragmatızmniń eldiń ósip-órkendeýindegi mańyzdy basymdyqtar ekenin aıtty. Jastarymyz osy «Jeti tuǵyrdy» tereń túsinip, olardy tý etip, elge qyzmet etýi kerek», - dedi Máýlen Áshimbaev.

Sondaı-aq ol ýaqyt ótken saıyn álem kúrdelenip kele jatqanyn eske saldy.

«Jańa syn-qaterler paıda bolyp jatyr. Munyń bári bizdiń elimizge de óz áserin tıgizeri sózsiz. Osyndaı jaǵdaıda táýelsizdigimizdi nyǵaıtý, egemendigimizdi baıandy etý, Elbasymyz aıtqandaı, óskeleń urpaqtyń eń basty mindeti bolýy kerek. Bizdiń jastarymyz otanshyl, patrıot azamattar. Sonymen birge óz isiniń naǵyz sheberi, bilikti áksibı maman bolý da asa mańyzdy», - dedi Senat tóraǵasy.