Senat tóraǵasy TMD parlamentaralyq assambleıasynyń otyrysynda qandaı máselelerdi kóterdi

ASTANA. KAZINFORM - Sankt-Peterbýrg qalasynda TMD Parlamentaralyq Assambleıasynyń 57-plenarlyq otyrysy ótti. Oǵan Dostastyqqa múshe memleketterdiń Parlament Palatalarynyń tóraǵalary qatysty, dep habarlaıdy QR Parlamenti Senatynyń baspasóz qyzmeti.

Qazaqstan delegatsııasyn Parlament Senatynyń spıkeri Máýlen Áshimbaev bastap bardy.

Otyrys kezinde Dostastyq elder Parlamentteriniń depýtattary saılaý protsesin halyqaralyq baıqaý ınstıtýtynyń demokratııa men saılaý mádenıetin damytýdaǵy rólin talqylady.

Bul rette Senat tóraǵasy óńirdegi elder yntymaqtastyǵynyń mańyzdy baǵyttarynyń biri saılaý men referendýmdardy ótkizýge monıtorıng júrgizý bolyp qala beretinin atap ótti.

«Qazaqstan Respýblıkasynyń Prezıdenti Qasym-Jomart Kemeluly Toqaev qazan aıynda Máskeýde ótken TMD memleketteri basshylarynyń sammıtinde bizdiń elderimiz úshin Dostastyqtyń áleýetin odan ári nyǵaıtý jáne onyń bedeldi halyqaralyq uıym retindegi rólin arttyrý sózsiz basymdyq ekenin atap ótti», – dedi Máýlen Áshimbaev.

Sondaı-aq Palata Spıkeri halyqaralyq baıqaý ınstıtýty Dostastyq keńistigindegi saılaý protsesteriniń mańyzdy jáne ajyramas bóligine aınalyp, olardyń ashyqtyǵyn arttyrýǵa yqpal etkenin tilge tıek etti.

«Halyqaralyq baıqaý degenimiz saılaý rásimderiniń saqtalýyn tekserý ǵana emes, sonymen qatar ol – zańnyń ústemdigin jáne memleket pen qoǵam arasyndaǵy dıalogty qoldaýdyń mańyzdy tetigi. Bul tásil saılaý protsesteriniń halyqaralyq standarttarǵa sáıkestigin qamtamasyz etýge jáne olarǵa degen senimdi nyǵaıtýǵa múmkindik beredi. Baıqaý úderisi egemendik pen memlekettilikti qurmetteý qaǵıdattaryna negizdeletinin atap ótken jón. Bul rette halyqaralyq baıqaý mıssııalarynyń qyzmeti obektıvti jáne ashyq sıpatta bolady», – dedi Qazaqstan Parlamenti Senatynyń spıkeri.

Sonymen qatar Máýlen Áshimbaev parlamenttik dıalogtyń memleketaralyq yntymaqtastyqty nyǵaıtýdaǵy mańyzy týraly aıtyp, Memleket basshysy Qasym-Jomart Toqaevtyń bastamasymen iske asyrylyp jatqan Qazaqstannyń qoǵamdyq-saıası ómirindegi reformalarǵa toqtaldy.

«Qazaqstan Prezıdenti Qasym-Jomart Kemeluly Toqaev atap ótkendeı, demokratııa degenimiz nátıje emes, ol – óz eliniń taǵdyryna beıjaı qaramaıtyn azamattardyń turaqty qatysýyn talap etetin protsess. Biz Qazaqstandaǵy bılik ınstıtýttarynyń saılanbalylyǵyn keńeıtip jatyrmyz. Aýyldyq eldimekenderdiń ákimderin saılaýdy qalyptastyrdyq. Endi aýdan ákimderin saılaýdy qolǵa aldyq», – dedi Máýlen Áshimbaev.

Odan bólek, Senat spıkeri Memleket basshysynyń bastamasymen júrgizilip jatqan reformalar aıasynda qazirgi tańda elimizde asa mańyzdy máseleler referendýmǵa shyǵarylatynyn aıtty.

«Qazaqstanda ótkizilgen AES salý máselesi boıynsha respýblıkalyq referendým barlyq mańyzdy sheshimdi el azamattarynyń pikirin eskere otyryp qabyldaýǵa úndeıtin «Halyq únine qulaq asatyn memleket» saıasatynyń jarqyn kórinisine aınaldy. Alǵash ret referendýmǵa ekonomıkalyq sıpattaǵy másele shyǵaryldy. Daýys berý protsesine 30 elden kelgen 40 myńnan astam ulttyq jáne 170 halyqaralyq baıqaýshylar monıtorıng júrgizdi. Baıqaý qorytyndysynda TMD mıssııasy referendýmnyń el zańnamasyna jáne halyqaralyq standarttarǵa sáıkes erkin ári ashyq ótkizilgenin jetkizdi. Biz TMD baıqaýshylar mıssııasyna osyndaı obektıvti jáne syndarly baǵalaý úshin rızashylyǵymyzdy bildiremiz», – dedi Máýlen Áshimbaev.

Senat Spıkeri óz sózinde birlesken jumystyń aldaǵy kezeńdegi basym baǵyttaryn belgilep, 2025 jyly TMD-ǵa tóraǵalyq etetin Tájikstan Respýblıkasyn quttyqtady.

Budan basqa, otyrys barysynda qatysýshylar TMD Parlamentaralyq Assambleıasynyń agrarlyq saıasat, tabıǵı resýrstar jáne ekologııa jónindegi turaqty komıssııasynyń tóraǵasy laýazymyna Qazaqstan Parlamenti Senatynyń depýtaty Olga Býlavkınanyń kandıdatýrasyn bekitti. Al, senator Gennadıı Shıpovskıhti TMD Jastar Parlamentaralyq Assambleıasynyń úılestirýshisi etip taǵaıyndaý týraly sheshim qabyldady.

Palata tóraǵasy TMD PAA alańynda parlamenttik delegatsııalardyń basshylarymen birqatar ekijaqty kezdesýler de ótkizdi.

Belarýs Respýblıkasy Ulttyq Jınalysy keńesiniń tóraǵasy Natalıa Kochanovamen kezdesýde Máýlen Áshimbaev kópjaqty alańdar aıasyndaǵy ózara is-qımyl, sondaı-aq, saýda-ekonomıkalyq jáne mádenı-gýmanıtarlyq baılanystardy nyǵaıtý jónindegi aýqymdy máselelerdi talqylady.

Senat spıkeri Tájikstan Respýblıkasynyń Madjlısı Olı Madjlısı mıllı tóraǵasy Rýstamı Emomalımen kezdesý barysynda Parlament depýtattarynyń óńirdiń ekonomıkalyq damýy jolyndaǵy birlesken kúsh-jigeri jóninde pikir almasty. Máýlen Áshimbaev tájik parlamentshilerin Qazaqstan Respýblıkasynyń Ornyqty damý salasyndaǵy ulttyq maqsattary men mindetteriniń iske asyrylýyna monıtorıng júrgizý jónindegi parlamenttik komıssııanyń «Ortalyq Azııanyń ornyqty damýy: Parlamentter men jergilikti ókildi organdardyń róli» taqyrybyna arnalǵan keńeıtilgen otyrysyna qatysýǵa shaqyrdy. Atalǵan is-sharany bıylǵy jeltoqsan aıynda Astanada ótkizý josparlanyp otyr.

Máýlen Áshimbaev Ózbekstan Respýblıkasy Olıı Májilisi Senatynyń Tóraǵasy Tanzıla Narbaevamen kezdesýde áriptesin 27 qazanda atalǵan elde demokratııa men memlekettiń saıası júıesin damytýdyń jańa kezeńin belgilep bergen saılaýdyń sátti ótýimen quttyqtady. Sondaı-aq Qazaqstan Parlamenti Senatynyń Spıkeri óńiraralyq ózara is-qımyldy odan ári arttyrý perspektıvalary jóninde sóz qozǵady.

Reseı Federatsııasy Federaldyq Jınalysy Federatsııa Keńesiniń Tóraǵasy Valentına Matvıenkomen suhbat barysynda Máýlen Áshimbaev parlamenttik dıalogtyń memleketaralyq yntymaqtastyq jáne ózekti máselelerge qatysty syndarly sheshimder qabyldaý kezindegi mańyzdy róline nazar aýdardy. Sonymen birge ol Qazaqstan Parlamentiniń Senaty men Reseıdiń Federatsııa Keńesi arasyndaǵy Yntymaqtastyq jónindegi komıssııa qyzmetiniń nátıjelerine jáne aldaǵy ýaqytta Parlamentaralyq yntymaqtastyqty damytýdyń 2025-2027 jyldarǵa arnalǵan jol kartasyna qol qoıýdyń mańyzyna toqtaldy.

Osyǵan deıin Senattyń respýblıkalyq bıýdjet týraly zańdy Májiliske qaıtarǵanyn jazǵan edik.