Senat Tóraǵasy Reseıdiń Qazaqstandaǵy Elshisine kóńil aıtty
ASTANA. KAZINFORM - Memleket basshysy Qasym-Jomart Toqaevtyń tapsyrmasy boıynsha Parlament Senatynyń Tóraǵasy Máýlen Áshimbaev Reseı Federatsııasynyń Qazaqstan Respýblıkasyndaǵy Elshiligine bardy.
Bul týraly QR Parlamenti Senatynyń baspasóz qyzmeti habarlady.
Palata Spıkeri Máskeý oblysynda bolǵan lańkestik oqıǵaǵa baılanysty elimizdegi Reseı Elshisine kóńil aıtty. Sondaı-aq kóńil aıtý kitabyna jazba qaldyryp, gúl shoǵyn qoıdy. Ol ondaǵan jazyqsyz jannyń ómirin qıǵan qaıǵyly oqıǵany qazaqstandyqtar aýyr kúızelispen qabyldaǵanyn atap ótti.
Senat Tóraǵasy Reseı Federatsııasynyń Qazaqstan Respýblıkasyndaǵy Tótenshe jáne Ókiletti Elshisi Alekseı Borodavkınmen suhbat barysynda Qazaqstan Prezıdenti Qasym-Jomart Toqaev beıbit azamattarǵa qarsy terrorıstik aktini qatań aıyptaǵanyn jáne lańkestikke qarsy kúreste Reseımen birge ekenin rastaǵanyn aıtty.
«Qazaqstan Prezıdenti Qasym-Jomart Kemeluly Toqaev BUU-ǵa múshe memleketterdi jazyqsyz azamattarǵa qarsy zorlyq-zombylyqtyń bul túrine biraýyzdan qarsylyq tanytýǵa shaqyrdy. Adamdyqqa jat mundaı lańkestik áreketti múlde aqtaýǵa bolmaıdy. Qaıǵyly oqıǵaǵa baılanysty Qazaqstan Respýblıkasy Parlamenti Senaty depýtattarynyń jáne jeke óz atymnan kóńil aıtamyn. Bul jaǵdaı Reseı halqymen birge bizdiń azamattarymyzdyń da qabyrǵasyn qaıystyrdy. Oryn alǵan lańkestikti biz aýyr kúızelispen qabyldadyq. Barlyq zardap shekkenderge sabyr tileı otyryp, olardyń tezirek saýyǵyp ketýine tilektestigimizdi bildiremiz», – dedi Máýlen Áshimbaev kóńil aıtý kitabyna qaldyrǵan jazbasynda.
Aıta keteıik, Memleket basshysy Qasym-Jomart Toqaev Reseı Prezıdentimen telefon arqyly sóılesip, Máskeý oblysyndaǵy lańkestik áreket saldarynan kóptegen adamnyń qaza tabýyna baılanysty qazaqstandyqtardyń atynan Vladımır Pýtınge jáne baýyrlas Reseı halqyna qaıǵyryp kóńil aıtty. Óz kezeginde Reseı Prezıdenti qoldaý kórsetkeni úshin Qasym-Jomart Toqaevqa alǵys bildirdi.
Sonymen qatar Memleket basshysynyń tóraǵalyǵymen Qazaqstan Respýblıkasy Qaýipsizdik Keńesiniń shuǵyl otyrysy ótti. Jıynda quqyq qorǵaý qurylymdary men jergilikti atqarýshy organdardyń jumys jospary, sondaı-aq ekstremaldy jaǵdaılardaǵy olardyń qyzmetin úılestirý máseleleri qarastyryldy. Prezıdent el azamattarynyń qaýipsizdigin jáne terrorızmge qarsy kúres maqsatynda Qazaqstannyń basqa memlekettermen jáne halyqaralyq uıymdarmen yqpaldastyǵyn qamtamasyz etýge baǵyttalǵan birqatar tapsyrma berdi.
Eske sala ketsek, 22-shi naýryz kúni Máskeýdiń soltústik-batysyndaǵy «Crocus City Hall» kontsert zalynda atys bolyp, kamýflıaj kıgen adamdar bebit turǵyndarǵa oq jaýdyrǵan.
Reseıde 24 naýryz Jalpyulttyq aza tutý kúni retinde jarııalandy.
