Senat spıkeri Ózbekstan Olıı majlısi senatynyń tóraǵasymen kezdesti
Qazaqstan Parlamenti Senatynyń Tóraǵasy Máýlen Áshimbaev «Ortalyq Azııa áıelderiniń dıalogi» atty halyqaralyq konferentsııaǵa qatysý úshin elimizge kelgen Ózbekstan Olıı Majlısi Senatynyń Tóraǵasy Tanzıla Narbaevamen kezdesti, dep habarlaıdy Kazinform.
Máýlen Áshimbaev Qazaqstan Parlamenti ótkizip jatqan halyqaralyq konferentsııaǵa qatysqany úshin Tanzıla Narbaevaǵa alǵys bildirdi. Sondaı-aq Ózbekstannyń Ornyqty damý maqsattaryna qol jetkizý jolynda Parlamentaralyq yntymaqtastyqtyń ekinshi jahandyq forýmyn sátti ótkizýimen quttyqtady. Senat Spıkeri Tashkentte ótken Forýmnyń mańyzyna toqtalyp, mundaı is-shara Ornyqty damý maqsattaryna qol jetkizý, ulttyq maqsattar men mindetterdi iske asyrýda zańnamany jetildirý jáne parlamenttik baqylaý tetikterin nyǵaıtý baǵytynda Parlament depýtattarynyń birlesken jumysyn jandandyra túsetinin aıtty.
«Qazaqstan Prezıdenti Qasym-Jomart Kemeluly Toqaevtyń tapsyrmasy boıynsha bıyl maýsym aıynda Ornyqty damý salasyndaǵy ulttyq maqsattary men mindetteriniń iske asyrylýyna monıtorıng júrgizý jónindegi parlamenttik komıssııa quryldy. Komıssııanyń jumysyna sarapshylar jáne azamattyq qoǵam ókilderi belsendi qatysyp keledi. Ornyqty damý maqsattaryn iske asyrýdyń jáne ındıkatorlardyń ulttyq júıesin jandandyrýdyń tıimdi tásilderi qalyptasyp jatyr. Álemdik tájirıbe kórsetkendeı, Ornyqty damý maqsattaryn el deńgeıinde sapaly iske asyrý Parlamenttiń osy baǵyttaǵy kún tártibine erekshe kóńil bólýine baılanysty bolyp otyr. Bul rette Qazaqstan men Ózbekstan ózara is-qımyldy arttyryp, Ornyqty damý maqsattarynyń iske asyrylýyna parlamenttik baqylaý júrgizý boıynsha tájirıbe almasýǵa mol múmkindik bar», – dedi Máýlen Áshimbaev.
Óz kezeginde Tanzıla Narbaeva elimizde júrgizilip jatqan saıası jáne áleýmettik-ekonomıkalyq reformalardy joǵary baǵalady. Sondaı-aq ol Qazaqstannyń Ornyqty damý maqsattaryna qol jetkizý jolyndaǵy ustanymynyń mańyzdylyǵyna nazar aýdardy. Ózbekstan Olıı Majlısi Senatynyń Tóraǵasy birlesip áreket etýdiń bereri mol ekenin aıta kele, túrli sala boıynsha ortaq jobalardy iske asyrýǵa daıyn ekenin jetkizdi.
