Senat respýblıkalyq bıýdjetti naqtylaýdy maquldady
Otyrys barysynda depýtattar «2020-2022 jyldarǵa arnalǵan respýblıkalyq bıýdjet týraly» Qazaqstan Respýblıkasynyń zańyna ózgerister men tolyqtyrýlar engizý týraly» zań jobasyn qarady.
Respýblıkalyq bıýdjetti naqtylaý pandemııamen kúres jumystaryn qarjylandyrýǵa, memlekettiń áleýmettik mindetterin oryndaýǵa, «Nurly jol», «Nurly jer» memlekettik baǵdarlamalary aıasynda ekonomıkanyń naqty salalaryn qoldaýǵa, agroónerkásiptik keshendi damytýǵa jáne ındýstrıaldy-ınnovatsııalyq damý baǵdarlamalaryn iske asyrýǵa baǵyttalǵan.
Senat tóraǵasy búgin qabyldanǵan zańnyń elimiz úshin mańyzy zor ekenin aıtty.
«Respýblıkalyq bıýdjetti naqtylaý Prezıdentimizdiń bıylǵy Joldaýynda aıtylǵan áleýmettik tapsyrmalardy oryndaýǵa, ekonomıkalyq ósýdi qalpyna keltirýge jáne pandemııamen kúresýge baǵyttalǵan. Shyn máninde, bıylǵy jyl indetke baılanysty ońaıǵa tıip jatqan joq. Soǵan qaramastan Prezıdentimiz memlekettiń halyq aldyndaǵy áleýmettik mindetterin oryndaý úshin bar múmkindikti jasaýda», – dedi Máýlen Áshimbaev.
Senat spıkeriniń aıtýynsha, respýblıkalyq bıýdjetti naqtylaý kezinde áleýmettik máselelerdi sheshýge, ekonomıkanyń naqty sektorlaryn qoldaýǵa basa mán berilgen.
«Zań jobalaryn talqylaý barysynda Senat depýtattary kóptegen ózekti máselelerdi kóterdi. Úkimet olarǵa muqııat nazar aýdaryp, oń sheshý úshin keshendi jumys júrgizedi dep oılaımyz. Bıýdjetten bólingen qarajat sapaly ári tıimdi jumsalyp, halyqtyń ıgiligine, ekonomıkany qalpyna keltirýge baǵyttalady dep senemiz», – dedi Senat tóraǵasy.
Sonymen qatar senatorlar «Qazaqstan Respýblıkasynyń Ulttyq qorynan 2020-2022 jyldarǵa arnalǵan kepildendirilgen transfert týraly» Qazaqstan Respýblıkasynyń zańyna ózgerister men tolyqtyrýlar engizý týraly» zań jobasyn maquldady.
Zań jobasynda Ulttyq qordan 2020 jylǵa arnalǵan respýblıkalyq bıýdjetke 4 770 mlrd. teńge somasynda kepildendirilgen transfert mólsheri belgilengen.
Sondaı-aq, otyrysta birqatar depýtattyq saýaldar joldandy. Senator Baýyrjan Qanıev «Ortalyq-Batys» jobasyn iske asyrý aıasynda «Shalqar-Embi-Qandyaǵash» avtomobıl jolynyń qurylysy týraly aıtty. Vladımır Volkov qylmystyq-atqarý júıesindegi máselelerdi kóterdi. Al Muhtar Qul-Muhammedtiń saýaly belgili ǵalym, akademık Salyq Zımanovtyń 100 jyldyǵyna qatysty boldy.
