Senat otandyq óndirýshilerdi qorǵaýǵa baǵyttalǵan qujatty maquldady

ASTANA. KAZINFORM — Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine taýarlardyń shyǵarylǵan elin aıqyndaý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, maquldandy.

Zańǵa Qazaqstan Respýblıkasy Parlamentiniń depýtattary bastamashylyq jasaǵan. Zańnyń negizgi maqsaty - otandyq taýar óndirýshiler tizilimin engizý, qazaqstandyq taýar óndirýshiler men olar óndiretin taýarlar týraly aqparatqa qol jetkizýdiń biryńǵaı tásilin qamtamasyz etý, memlekettik qoldaý sharalarynyń ataýlylyǵyn arttyrý. QR Ónerkásip jáne qurylys mınıstrligi Tizilimdi júrgizýge jaýapty ýákiletti memlekettik organ retinde belgilengen.

Senattyń Ekonomıkalyq saıasat, ınnovatsııalyq damý jáne kásipkerlik komıtetiniń málimetinshe, bul qujattyń negizgi jańalyqtary:

- Qazaqstandyq taýar óndirýshiler tizilimin qalyptastyrý kezinde tsıfrlyq derekterdi paıdalaný, saraptamany tsıfrlandyrý jáne tolyqqandy aqparattyq júıeni engizý;

- saýda saıasatynda ishki naryqty jáne otandyq óndirýshilerdi qorǵaýǵa baǵyttalǵan retteýshi sharalardy ázirleý;

- óndiris sharttarynyń oryndalýyna keshendi monıtorıngti engizý;

- iri tapsyrys berýshiler (jer qoınaýyn paıdalanýshylar, kvazımemlekettik sektor sýbektileri, tabıǵı monopolııa sýbektileri, júıe quraýshy kásiporyndar) úshin elishilik qundylyqty damytý baǵdarlamalaryn engizý jáne iske asyrý jónindegi jańa mindettemelerdi aıqyndaý;

- óńdeý ónerkásibi kásiporyndarynyń ónimderin uzaq merzimdi kepildendirilgen satyp alý tetigin engizý eskerilgen.

- Zańda otandyq taýar óndirýshilerdiń tizilimin qalyptastyrý jáne monıtorıngileý tártibi, ónerkásipti damytýǵa baǵyttalǵan sharttardy josparlaý tártibi, tizbesin ýákiletti organ bekitetin júıe quraýshy kásiporyndar uǵymy, kepildendirilgen satyp alý sharttaryn jasasý tártibi, sondaı-aq óndiris, óndiristik jáne tehnologııalyq operatsııalar sharttaryn ázirleý ári bekitý tártibi de aıqyndalǵan, - delingen Senat komıtetiniń aqparatynda.

Senator Serik Shaıdarovtyń aıtýynsha, qazirgi ýaqytta «Atameken» Ulttyq kásipkerler palatasymen sertıfıkattyń 3 túri beriledi. Olar ST-KZ, Indýstrııalyq sertıfıkat jáne eksporttyq nysandaǵy sertıfıkattar. Osy sertıfıkattardy berý aqyly negizde júzege asyrylǵan bolatyn. Jańa tizilimniń qurylýyna baılanysty «ST-KZ» jáne ındýstrııalyq sertıfıkat óz qoldanysyn toqtatady. Bul rette, «Atameken» Ulttyq kásipkerler palatasyna taýarlardy eksporttaý jáne keri eksporttaý maqsatynda tek eksporttyq sertıfıkattar berý ǵana qalady. Óz kezeginde, «Atameken» Ulttyq kásipkerler palatasy toqsan saıyn Saýda jáne ıntegratsııa mınıstrligine berilgen sertıfıkattar boıynsha esep joldaıtyn bolady.

- Sertıfıkattaýdy alýdyń qoldanystaǵy protsesi adam faktorynyń yqpalynyń joǵary deńgeıimen jáne memlekettik aqparattyq júıelermen, sondaı-aq qazaqstandyq óndirýshilerdiń biryńǵaı bazasymen ıntegratsııanyń bolmaýymen sıpattalatynyn atap ótken jón. Bul sertıfıkattardy alýdyń obektıvtiligi men ashyqtyǵyna teris áser etedi. Osy rette, sertıfıkattar berý jeke sarapshylardyń qorytyndysy negizinde aqyly negizde júzege asyrylady. Sonymen qatar, Bas prokýratýranyń tekserý qorytyndysy boıynsha taýardyń shyǵý tegi týraly sertıfıkattardy zańsyz alý, josyqsyz sýbektilerdiń múddelerin qoldaý, taýarǵa durys emes málimetter engizý jáne taǵy da basqa faktiler anyqtaldy. Bul rette, óndirýshilerdi esepke alý jáne olardyń ónimderin ilgeriletý máseleleri birneshe mınıstrlik pen vedomstvolardyń quzyretinde, alaıda olardyń arasynda tıimdi ózara is-qımyl joq. Jańa tetikke sáıkes, tizilimdi qalyptastyrý jáne júrgizý birneshe kezeńnen turady. Olar - ótinim berý, tsıfrlyq verıfıkatsııa, óndiristi baǵalaý jáne tizilimge engizý nemese engizbeý týraly sheshim qabyldaý. Tizilimge engizý mehanızmi ashyq jáne aıqyn bolatynyn aıta ketý kerek. Osy tetik engizilgennen keıin, tizilim eldiń óndiristik áleýetin baǵalaýǵa múmkindik beredi jáne tıisinshe, tutastaı alǵanda ónerkásiptiń damýyna áser etedi. Qazaqstanda qansha taýar óndirilgeni belgili bolady, óndiris pen qaztutynýdyń oqshaýlaný deńgeıin kórsetedi, - dep túsindirdi depýtat.

Zańda kózdelgen tsıfrlyq derekterdi paıdalaný jabdyqtarmen, tehnologııalyq operatsııalarmen baılanysty manıpýlıatsııalardy azaıtady. Kompanııalar óz óniminiń shyǵý tegin tezirek rastap, memlekettik satyp alýlarǵa qatysa alady, bul naryqtaǵy senimdilikti arttyrady. Tizilim ótinish berýshi men ákimshi arasyndaǵy tikeleı baılanysty barynsha azaıtady.

Buǵan deıin otandyq taýar óndirýshilerdiń tizilimi jasalatynyn jazǵan edik.

Jaqynda qazaqstandyq taýar óndirýshilermen 1,4 trln teńgege kelisimshart jasalatyny málim boldy.