Senat Qazaqstan-Túrikmenstan arasyndaǵy shekara rejımine qatysty zańdy maquldady

ASTANA. QazAqparat – Senat depýtattary «Qazaqstan Úkimeti men Túrikmenstan Úkimeti arasyndaǵy Qazaqstan-Túrikmenstan memlekettik shekarasynyń rejımi týraly kelisimdi ratıfıkatsııalaý týraly» Zańdy maquldady, dep habarlaıdy QazAqparat tilshisi.

Buǵan deıin Májilis qabyldaýynan ótken qujatty Senat depýtattaryna palatanyń Halyqaralyq qatynastar, qorǵanys jáne qaýipsizdik komıtetiniń múshesi Álisher Satybaldıev tanystyrdy.

«2021 jylǵy 25 qazanda eki eldiń úkimetteri arasynda Qazaqstan-Túrikmenstan memlekettik shekarasynyń rejımi týraly kelisimge qol qoıyldy.

Bul kelisim arqyly jol máselesi, ótkizý pýnktterindegi jaǵdaı jáne basqa da nazar aýdarýdy qajet etetin máselelerde týyndaıtyn barlyq jaǵdaılardy retteý josparlanyp otyr.

Memlekettik shekaranyń rejımi shekarada qoldanylyp júrgen erejemen mynandaı tártipti quraıdy: Birinshisi – memlekettik shekarany kútip ustaý. Ekinshisi – memlekettik shekara arqyly adamdardyń, kólikterdiń, júkterdiń jáne basqa da múliktiń ótýi. Úshinshisi – memlekettik shekara arqyly ushýlardy júzege asyrý. Tórtinshi – memlekettik shekarada, shekaralyq beldeýlerde, sondaı-aq shekaralyq sýlarda sharýashylyq jáne ózge de qyzmetti júzege asyrý. Besinshi – shekaradaǵy oqıǵany sheshý», - dedi Senat depýtaty.

Onyń málimeti boıynsha qazir Qazaqstan-Túrikmenstan memlekettik shekarasyn qorǵaıtyn bir shekara bólimshesi, 4 shekara zastavasy jáne radıolokatsııalyq stantsııalarmen jabdyqtalǵan 9 tehnıkalyq baqylaý beketi, 2 ótkizý pýnkti jumys istep tur.

«Kelisimde azamattar men júk kólikteriniń shekaradan ótýine tıisti jaǵdaı jasaý úshin qajetti normalar eskerilgen.

Kelisim Qazaqstan-Túrikmenstan memlekettik shekarasynyń rejımin belgileýdi jáne Qazaqstan Respýblıkasynyń ulttyq qaýipsizdigin odan ári nyǵaıtýdy kózdeıdi. Óıtkeni memlekettik shekarada ártúrli shekaralyq qaqtyǵystar týyndaýy múmkin. Ondaı qaqtyǵystardy taraptardyń shekaralyq ókilderi qaraıdy.

Mysaly, shekaralyq belgilerdi búldirý, jaıaý nemese kólik quraldaryn qoldaný arqyly; taraptardyń shekarashylarymen kelisýden ótpegen jergilikti turǵyndarmen aýyl-sharýashylyq jumys júrgizý kezinde, transshekaralyq nysandarda qyzmetkerler men jumysshylar jumys júrgizý kezinde memlekettik shekarany buzý; kórshiles aýmaqqa úı janýarlaryn zańsyz ótkizý; kórshiles aýmaqqa órttiń ótýi barysynda memlekettik shekarany buzý bolyp tabylady. Sońǵy jyldary – pılotsyz ushý apparattarynyń kórshi aýmaqqa zańsyz ushyp ótýi bolýy múmkin», - dedi Álisher Satybaldıev.

Komıtet múshesiniń aıtýynsha, atalǵan shart shektelmegen merzimge jasalady. Taraptardyń biri ekinshi tarapqa ony toqtatý nıeti týraly jazbasha aqparatty dıplomatııalyq arnalar arqyly bergenge deıin jaramdy bolady.

Túrikmen taraby bul qujatty byltyrǵy sáýir aıynda ratıfıkatsııalaǵan.

Senat depýtatttary zańdy maquldaý týraly sheshim qabyldady.