Senat Qazaqstan men Ózbekstannyń saýda baılanysyn nyǵaıtatyn qujatty maquldady
ASTANA. KAZINFORM – Búgin Senattyń jalpy otyrysynda «Qazaqstan Úkimeti men Ózbekstan Úkimeti arasyndaǵy «Ortalyq Azııa» halyqaralyq ónerkásiptik kooperatsııa ortalyǵynyń qyzmetin retteý týraly kelisimdi ratıfıkatsııalaý týraly» Zańy maquldandy.
Zańnyń negizgi maqsaty – ekijaqty ózara yntymaqtastyqtyń barlyq áleýetin tıimdi júzege asyrý. Ózbekstan – Ortalyq Azııadaǵy Qazaqstannyń negizgi saýda seriktesteriniń biri. Eki el arasyndaǵy qarym-qatynas ózara qurmet pen qoldaýǵa negizdelip, túrli baǵyttarda qarqyndy damyp otyr.
- Atalǵan kelisimdi jasasý – Qazaqstan Respýblıkasy men Ózbekstan Respýblıkasy arasyndaǵy ekijaqty yntymaqtastyq jónindegi Úkimetaralyq komıssııanyń 20-otyrysynyń sheshimin iske asyrýǵa baǵyttalǵan mańyzdy qadamdardyń biri. «Ortalyq Azııa» halyqaralyq ónerkásiptik kooperatsııa ortalyǵy óńirdegi eń iri júk aǵyndaryn biriktirý, óńdeý jáne taratý, sondaı-aq «Soltústik – Ońtústik» kólik dálizi aıasynda óndiristik kooperatsııany damytý ortalyǵy retinde qyzmet atqarady, - dedi senator Alısher Satvaldıev.
Bul ortalyq Qazaqstannyń «Atameken» jáne Ózbekstan jaǵynan «Gúlstan» baqylaý-ótkizý beketterine jaqyn ornalasady. Ol óndiristik alańdardan, qoımalardan jáne kólik ınfraqurylymynan turatyn bolady. Mundaı sheshim júk tasymalyn jedeldetýge, logıstıkalyq shyǵyndardy azaıtýǵa, jetkizý tizbegindegi qatysýshylar sanyn qysqartýǵa, ónimniń sońǵy tutynýshy úshin qunyn tómendetýge jáne jetkizilimderdiń tıimdiligin arttyrýǵa múmkindik beredi. Kelisimge sáıkes, ortalyqtyń jalpy aýmaǵy 100 ga bolyp belgilendi. Taraptar elý gektardan jer bóledi. Bul aýmaqqa óńirlik ındýstrııalyq aımaq mártebesi beriledi.
- Túrkistan oblysy ótkizgen ashyq konkýrs nátıjesinde «Trans Continental Logistic Gr» kompanııasy tikeleı ınvestor retinde anyqtaldy. Investor ortalyqtyń ishki jáne syrtqy ınfraqurylymyna qarjy quıady. Aldyn ala baǵalaý boıynsha, qajet ınvestıtsııalar shamamen 27 mlrd teńgeni quraıdy. Investıtsııalyq kelisimderge qol qoıylǵan soń, naqty qarjylandyrý sharttary men somasy naqtylanady. Qazirgi ýaqytta ınvestor ortalyqty qajet ınfraqurylymmen qamtamasyz etý maqsatynda jobalaý-smetalyq qujattamany ázirlep jatyr. Tehnıkalyq iske qosý 2026 jyldyń 4-toqsanyna, al resmı ashylý 2027 jyldyń alǵashqy jartyjyldyǵyna josparlanǵan. Ortalyq jańa óndirister men jumys oryndaryn qurýdy, aýyl sharýashylyǵy jáne ónerkásiptik ónimderdi qaıta óńdeýdi, sondaı-aq farmatsevtıka, elektrotehnıka, hımııa, teri óńdeý, toqyma jáne tigin ónerkásibi salasyndaǵy óndiristi damytýǵa qoldaý kórsetedi. Bul óz kezeginde taýar aınalymyn aldaǵy bes jylda 10 mlrd AQSh dollaryna deıin arttyrýǵa yqpal etedi, - dedi depýtat.
Kelisimdi ratıfıkatsııalaý – «Ortalyq Azııa» halyqaralyq ónerkásiptik kooperatsııa ortalyǵyn qurý arqyly shekara mańyndaǵy eldermen ekijaqty saýda-ekonomıkalyq qatynastardy nyǵaıtýǵa jáne óndirýshiler men kásipkerler arasyndaǵy iskerlik baılanystardy jandandyrýǵa múmkindik beredi.
Budan buryn habarlanǵandaı, Qazaqstan men Ózbekstan mádenı baılanystardy nyǵaıtýǵa múddeli.
Eske salaıyq, Qazaqstan men Ózbekstan arasynda qosymsha 4 saýda dálizi ashylýy múmkin.