Senat Eksporttyq-kredıttik agenttik týraly zańdy maquldady
Senat qazaqstandyq óndirýshilerdiń shıkizattyq emes taýarlaryn syrtqy naryqtaǵy eksportyn Eksporttyq-kredıttik agenttik arqyly damytýdy kózdeıtin zańdy maquldady, dep Kazinform.
Qujattyń tolyq ataýy – «Qazaqstan Respýblıkasynyń keıbir zańnamalyq aktilerine eksporttyq-kredıttik agenttik jáne shıkizattyq emes taýarlardyń (jumystardyń, kórsetiletin qyzmetterdiń) eksportyn ilgeriletý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańy.
«Eksporttyq-kredıttik agenttik syrtqy saýda operatsııalary kezinde tólem jasamaý táýekelinen saqtandyratyn qorǵanys qyzmetin kórsetetin bolady. Saqtandyrýmen qatar memlekettik kepildendirýdi jáne syıaqy mólsherlemelerin sýbsıdııalaý, shartty týrde salymdar arqyly eksport aldyndaǵy jáne eksporttyq saýdany qarjylandyrý, sondaı-aq qarjy agenttiginiń fýnktsııalaryn júzege asyrý kózdeledi. «Saqtandyrý qyzmeti týraly» Zań EKA-ǵa qoldanylmaıdy», - dedi zańdy ekinshi oqylymda tanystyrǵan senator Serik Shaıdarov.
Onyń aıtýynsha, zańda Eksporttyq-kredıttik agenttigimen úlestes tulǵalarǵa jeńildikter berýge tyıym salynǵan.
«Qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl týraly» zańǵa ózgeristerde EKA-ny qarjy monıtorıngi sýbektilerine jatqyzý usynylady. EKA ózi úshin sýbsıdııalaý jáne kepildik berý sııaqty qoldaý sharalarynyń jańa túrlerin júzege asyratynyn nazarǵa ala otyryp, Ekonomıkalyq saıasat, ınnovatsııalyq damý jáne kásipkerlik komıteti Senat otyrystarynda EKA qyzmeti máseleleri boıynsha Saýda jáne ıntegratsııa mınıstrligi men «Báıterek» UBH» AQ-ny jıi tyńdaýdy, al osy zańdy sátti iske asyrý jónindegi aqparatty bir jyl ótken soń tyńdaýdy usynady», - dedi senator.
