Senat EEK kadr quramyna qatysty zań qabyldady

ASTANA. QazAqparat – Senattyń jalpy otyrysynda «2014 jylǵy 29 mamyrdaǵy EAEO týraly shartqa Eýrazııalyq ekonomıkalyq komıssııanyń kadr quramyn qalyptastyrý tetigin naqtylaý bóligine ózgerister engizý týraly hattamany ratıfıkatsııalaý týraly» Zań qabyldandy, dep habarlaıdy QazAqparat tilshisi.

«Zań jobasynda Eýrazııalyq ekonomıkalyq komıssııanyń laýazymdy tulǵalarynyń eńbek sharttarynyń merzimin ózgertý, múshe memlekettiń komıssııaǵa jumys isteýge túsýge nıet bildirgen kandıdattardy ulttyq irikteýdi júrgizý múmkindigi, qyzmetkerlerdi merzimi shektelmegen ýaqyttan 5 jyldyq kelisimsharttarǵa aýystyrý, sondaı-aq jumys istep júrgen qyzmetkerlerdi ótpeli merzimderge aýystyrý bóliginde Eýrazııalyq ekonomıkalyq odaq týraly shartqa túzetýler kózdelgen», - dedi QR Premer-Mınıstriniń orynbasary - Saýda jáne ıntegratsııa mınıstri Serik Jumanǵarın.

Onyń aıtýynsha, komıssııanyń laýazymdy adamdarymen (departament dırektorlary men olardyń orynbasarlary) jasalatyn eńbek sharttarynyń merzimin 4 jyldan bastap komıssııa alqasynyń jumys merziminen aspaıtyn merzimge ózgertý eskerilgen. Qazirgi kezde komıssııanyń laýazymdy qyzmetkerleriniń jumys kezeńi komıssııa alqasynyń kezekti quramynyń jumys kezeńine baılanystyrylmaǵan.

«Bul jaǵdaı 4 jyldyq kelisimshart merziminiń aıaqtalýyna oraı dırektor nemese dırektordyń orynbasarlary komıssııa alqasynyń jańa múshesiniń aldyna qoıǵan mindetterin oryndaýǵa úlgermegen kezde, komıssııanyń jumysynda qıyndyqtar týǵyzady. Bul rette jańa laýazymdy tulǵalardy taǵaıyndaý, sondaı-aq buryn júrgizilgen jumysqa tolyqqandy tartý belgili bir ýaqytty alady. Osy norma komıssııa alqasynyń jańa quramynyń kelýimen komıssııanyń laýazymdyq deńgeıin bir mezgilde jańartýǵa múmkindik beredi» - dedi mınıstr.

Atap aıtqanda, komıssııa qyzmetkerlerin merzimsiz eńbek sharttarynan 5 jyldyq shartqa aýystyrý qarastyrylǵan. Bul turǵyda attestattaý nátıjelerin eskere otyryp, alqanyń jetekshilik etetin múshesiniń usynýy boıynsha atalǵan merzimdi uzartý múmkindigi bolady.

«Qazirgi kezde komıssııa qyzmetkerleriniń eńbek sharttarynda komıssııadaǵy eńbek qyzmetiniń kelisimshartyn aıaqtaýdyń qandaı da bir merzimderi kózdelmegen. Osy normany iske asyrý komıssııanyń kadrlyq quramyn jańartýǵa, onyń ishinde Qazaqstannyń ókildigin kúsheıtýge, sondaı-aq Qazaqstan ókilderin komıssııada rotatsııalaýdy júrgizýge múmkindik beredi», - dedi Serik Jumanǵarın.

Onyń paıymynsha, zań jobasyn qabyldaý teris áleýmettik-ekonomıkalyq nemese quqyqtyq saldarǵa ákep soqtyrmaıdy jáne respýblıkalyq bıýdjetten qosymsha qarajat bólýdi talap etpeıdi.