Senat EAEO elderindegi aýdıtorlyq qyzmetke arnalǵan zańdy maquldady
Búgin Senattyń jalpy otyrysynda «Eýrazııalyq ekonomıkalyq odaq sheńberinde aýdıtorlyq qyzmetti júzege asyrý týraly kelisimdi ratıfıkatsııalaý týraly» zańy maquldandy, dep habarlaıdy Kazinform.
«Joǵary Eýrazııalyq ekonomıkalyq keńestiń 2016 jylǵy 26 jeltoqsandaǵy bekitilgen aýdıt salasyndaǵy qyzmetterdiń biryńǵaı naryǵyn qalyptastyrý jónindegi josparyn iske asyrý úshin Eýrazııalyq ekonomıkalyq odaq aıasynda aýdıtorlyq qyzmetti júzege asyrý týraly kelisim ázirlendi. Kelisimge Memleket basshylary 2022 jylǵy 19 sáýirde Máskeý qalasynda qol qoıdy. Kelisimniń maqsaty – EAEO-da aýdıtorlyq qyzmetterdiń biryńǵaı naryǵyn qalyptastyrý, qabyldaýshy elde qosymsha mekeme ashpastan, shekteýler men ereksheliktersiz aýdıtorlyq qyzmetterdi kórsetý jáne alý, aýdıtorlardyń biliktilik attestattary men aýdıtorlyq qorytyndylaryn ózara taný», - dedi senator Serik Óteshov.
Onyń aıtýynsha, kelisim aýdıtorlarǵa, aýdıtorlyq uıymdarǵa, emtıhandarǵa, sapaǵa syrtqy baqylaýǵa jáne aýdıtorlyq qyzmet standarttaryna biryńǵaı talaptardy aıqyndaıdy. Sondaı-aq Eýrazııalyq ekonomıkalyq odaqqa múshe memleketterde aýdıtorlyq qyzmetti júzege asyrýǵa jáne retteýge biryńǵaı tásildi qamtamasyz etedi. Aıta ketý kerek, bul Kelisim bıznestiń múmkindikterin, aýdıtorlyq kompanııalardyń tıimdiligin keńeıtýge múmkindik beredi ári jalpy qyzmettiń damýyna yqpal etedi. Sonymen birge, otandyq aýdıtorlyq kompanııalardyń básekege qabilettiliginiń ósýine áser etedi.
«Qazaqstan úshin aýdıtorlyq qyzmetti ishki retteýdiń keıbir erekshelikteri Kelisimniń 32-babynda eskerilgen. Bul erekshelikter qazaqstandyq aýdıtorlar men aýdıtorlyq uıymdardyń quqyqtaryna qysym jasamaýǵa múmkindik beredi. Kelisim eki satyda kúshine enedi. Birinshiden, ratıfıkatsııalaýdan keıin EAEO-ǵa múshe memleketterde aýdıtorlyq qyzmetterdiń biryńǵaı naryǵyn qurýdyń uıymdastyrý máselelerine arnalǵan baptar jumys isteı bastaıdy. Ekinshiden, biryńǵaı naryq aýdıtorlyq qyzmetti júzege asyrý týraly kelisimdi iske asyrý úshin ázirlenetin jáne EAEO-ǵa múshe memleketterdiń organdary arasyndaǵy ózara is-qımyl tártibin aıqyndaıtyn aýdıt salasyndaǵy ákimshilik yntymaqtastyq týraly kelisimge qol qoıylǵannan keıin, EAEO-nyń Joǵary keńesiniń sheshimimen aıqyndalǵan kúnnen bastap jumys isteı bastaıdy. Zańdy ratıfıkatsııalaý bizdiń elimiz úshin áleýmettik-ekonomıkalyq jáne quqyqtyq saldarǵa ákep soqpaıdy jáne respýblıkalyq bıýdjetten qarajat bólýdi talap etpeıdi», - dedi senator.
