Senat EAEO-da birlesken jobalardy qarjylandyrýǵa qatysty qujatty maquldady
ASTANA. KAZINFORM — Búgin Senattyń jalpy otyrysynda «2014 jylǵy 29 mamyrdaǵy Eýrazııalyq ekonomıkalyq odaq týraly shartqa EAEO-ǵa múshe memleketter ónerkásip salalarynda birlesken kooperatsııalyq jobalardy iske asyrǵan kezde qarjylaı járdem kórsetý bóliginde ózgerister engizý týraly hattamany ratıfıkatsııalaý týraly» Zańy maquldandy.
Hattamaǵa 2023 jylǵy 25 mamyrda Máskeý qalasynda qol qoıyldy. Zańnyń maqsaty — Eýrazııalyq ekonomıkalyq odaqqa múshe memleketterdiń ónerkásip salalaryndaǵy birlesken kooperatsııalyq jobalardy qarjylandyrý úshin quqyqtyq negiz qurýǵa baǵyttalǵan Hattamany ratıfıkatsııalaý.
Senattyń Ekonomıkalyq saıasat, ınnovatsııalyq damý jáne kásipkerlik komıtetiniń málimetine qaraǵanda, Hattamada tizbesin Úkimetaralyq keńes aıqyndaıtyn ónerkásip salalarynda birlesken kooperatsııalyq jobalardy iske asyrý boıynsha qoldaý bóliginde ózgerister men tolyqtyrýlar engizý eskerilgen.
Qujatqa sáıkes EAEO komıssııasynyń Keńesi Odaq bıýdjetiniń qarajaty esebinen qarjylyq járdem kórsetý týraly sheshim qabyldaı alady. EAEO-ǵa múshe memleketterdiń bıýdjetterine Odaq bıýdjeti bekitilgen jyldyń aldyndaǵy qarjy jylyndaǵy arnaıy, dempıngke qarsy jáne ótemaqy bajdarynan túsetin túsimderdiń jalpy somasynyń 10 paıyzy qarjylandyrý kózi retinde qarastyrylǵan. Bir jobaǵa arnalǵan sýbsıdııanyń eń joǵary kólemi jylyna 1,8 mlrd teńgeni quraıdy, tıisinshe 5 jylda — 9,4 mlrd teńgeni qamtıdy.
Budan basqa, Ónerkásiptik yntymaqtastyq týraly hattama (EAEO týraly shartqa № 27 qosymsha) mynalardy: Odaq bıýdjetinde kózdeletin qarajat kólemin; múshe memleketter ónerkásip salalarynda birlesken kooperatsııalyq jobalardy iske asyrǵan kezde paıyzdyq araqatynas mólsherin jáne qarjylaı járdem kórsetý nysanyn reglamentteıtin normalarmen tolyqtyryldy.
Hattamaǵa sáıkes múshe memleketterdiń ónerkásip salalarynda birlesken kooperatsııalyq jobalardy irikteý jáne iske asyrý, sondaı-aq EAEO bıýdjetiniń qarajaty esebinen qarjylyq járdem kórsetý tártibi Úkimetaralyq keńes bekitken erejege sáıkes aıqyndalady. Kelisimdi ratıfıkatsııalaǵan kezde ony iske asyrý teris áleýmettik-ekonomıkalyq jáne quqyqtyq saldarlarǵa alyp kelmeıdi, sondaı-aq qosymsha qarjylyq shyǵyndardy talap etpeıdi.
