Senat bıýdjet qarajaty kólemin ósirýge baǵyttalǵan zańdy qabyldady

ASTANA. QazAqparat – Búgin Senattyń jalpy otyrysynda «Eýrazııalyq ekonomıkalyq odaqta tasymaldaýdy qadaǵalaý úshin navıgatsııalyq plombalardy qoldaný týraly kelisimdi ratıfıkatsııalaý týraly» Zań qabyldandy, dep habarlaıdy QazAqparat tilshisi.

«2022 jylǵy 19 sáýirde Eýrazııalyq ekonomıkalyq odaqqa múshe memleketterdiń basshylary taýar tasymaldaýdy qadaǵalaý úshin navıgatsııalyq plombalardy qoldaný týraly Kelisimge qol qoıdy. Osy Kelisim taýarlardy navıgatsııalyq plombalardy qoldana otyryp, olardy Eýrazııalyq ekonomıkalyq odaqtyń aýmaǵy boıynsha ótkizý kezinde qadaǵalaý múmkindigin qamtıdy. Taýarlardyń sanattary men kólik erekshelikterine baılanysty ótpeli kezeńder qarastyrylǵan. Bul qadaǵalaýdyń árbir kezeńiniń bastalýymen navıgatsııalyq plombalardy qoldanýdyń tıimdiligin jetildirýge múmkindik beredi», - dedi QR Premer-Mınıstriniń orynbasary – Qarjy mınıstri Erulan Jamaýbaev.

Onyń aıtýynsha, bıznes úshin osy kelisimniń artyqshylyǵy – óz taýarlaryn EAEO keńistiginde qaýipsiz tranzıtteý, oǵan múshe memleketterdiń baqylaýshy organdary jaǵynan baqylaýdyń qosymsha is-sharalaryn boldyrmaý múmkindigin jasaý.

«Kelisim memleket úshin halyqaralyq tasymaldardyń ashyqtyǵyn, «jalǵan tranzıt» pen «jalǵan ımportty» boldyrmaýǵa jáne bıýdjetke aqsha túsimderiniń ulǵaıýyna múmkindik beredi», - dedi mınıstr.