Senat bala quqyǵyn qorǵaýǵa arnalǵan zańdy maquldady
Búgin Senattyń jalpy otyrysynda «Bala quqyqtary týraly konventsııaǵa habarlar rásimine qatysty fakýltatıvtik hattamany ratıfıkatsııalaý týraly» Zańy maquldandy, dep habarlaıdy Kazinform.
Zańnyń negizgi maqsaty - 2011 jylǵy 19 jeltoqsanda BUU Bas Assambleıasy qabyldaǵan Bala quqyqtary týraly konventsııaǵa habarlar rásimine qatysty fakýltatıvtik hattamany ratıfıkatsııalaý. Fakýltatıvtik hattama Qazaqstan 1994 jylǵy 8 maýsymda ratıfıkatsııalaǵan BUU-nyń Bala quqyqtary týraly konventsııasyna qosymsha kelisim retinde sanalady.
«Zańnyń mindeti – Bala quqyqtary týraly konventsııada bekitilgen quqyqtar buzylǵan jaǵdaılarda balalardyń nemese olardyń ata-analarynyń (zańdy ókilderiniń) jeke shaǵymdaryn qaraý tetikterin belgileıtin Hattamany ratıfıkatsııalaý. Hattamaǵa sáıkes balalar nemese olardyń ókilderi BUU-nyń Bala quqyqtary jónindegi komıtetine óz quqyqtarynyń buzylǵandyǵy týraly shaǵymdardy tikeleı bere alady. Ol óz kezeginde árbir isti qarap, qatysýshy memleketterge naqty usynymdardy qamtıtyn sheshimder qabyldaıdy», - delingen Senattyń Áleýmettik-mádenı damý jáne ǵylym komıtetiniń málimetinde.
Osy qujatqa qol qoıý Qazaqstannyń bala quqyqtaryn qamtamasyz etý jáne balalardy quqyqtyq qorǵaý tetikterin keńeıtý jónindegi mindettemesin taǵy da rastaıdy.
Senator Talǵat Júnisovtiń aıtýynsha, qaralap otyrǵan hattamaǵa sáıkes, eger balalar nemese olardyń ókilderi Qazaqstandaǵy barlyq deńgeıdegi sottarmen qaralyp, shyqqan sheshimmen kelispese, Birikken Ulttar Uıymynyń Bala quqyqtary jónindegi komıtetine óz quqyqtarynyń buzylýy týraly shaǵymdar túsire alady. Fakýltatıvtik hattama habarlamalardy qaraýdyń eki rásimin qarastyrady, olar – jeke jáne memleketaralyq habarlamalar.
«Habarlamany jabyq otyrysta qaraǵannan keıin Komıtet óz usynymdaryn tıisti taraptarǵa joldaıdy. Memleket óz kezeginde Komıtettiń usynystaryn qaraýǵa jáne qajetti sharalardy qabyldaý mindetin alady», - dedi depýtat.
Bul zań aıasynda bala quqyqtaryn qorǵaý deńgeıin arttyrý, Qazaqstan Respýblıkasynyń azamattaryna ózderiniń ekonomıkalyq, áleýmettik jáne mádenı múddelerin halyqaralyq qorǵaý quqyǵyn qamtamasyz etý eskerilgen.
