Senat «Astana» qarjy ortalyǵyna qatysty qujatty Májiliske qaıtardy

ASTANA. QazAqparat – Búgin Senattyń jalpy otyrysynda «Qazaqstan Respýblıkasynyń keıbir konstıtýtsııalyq zańdaryna ózgerister men tolyqtyrýlar engizý týraly» zań jobasy qaraldy. Qujatqa túzetýler engizilgendikten, zań jobasy Májiliske qaıtaryldy, dep habarlaıdy QazAqparat tilshisi.

Senattyń Qarjy jáne bıýdjet komıtetiniń málimetine qaraǵanda, zań jobasynyń maqsaty - sottardyń qyzmetin ári sot salasyndaǵy ákimshilendirýdi jetildirý, Memlekettik Eltańbany paıdalaný tártibin tolyqtyrý, sondaı-aq qarjy salasyndaǵy ınnovatsııalardy damytý úshin eldiń negizgi platformasy retinde «Astana» halyqaralyq qarjy ortalyǵynyń jyldam damýyn qamtamasyz etý jáne onyń ıýrısdıktsııasyn ınvestıtsııalar tartý úshin paıdalaný.

Qujat aıasynda aýdandyq jáne olarǵa teńestirilgen sottardyń qurylýyn jetildirý, ártúrli deńgeıdegi sottar men sýdıalardyń ókilettikterin tolyqtyrý, «Azamattarǵa arnalǵan úkimet» memlekettik korporatsııasynyń mórlerinde Memlekettik Eltańbany paıdalaný, Qazaqstanda tehnologııalyq kompanııalardy damytý jáne tartý úshin «Astana» halyqaralyq qarjy ortalyǵynyń alańynda tsıfrlyq aktıvter aınalymyn quqyqtyq retteýdiń tolyqqandy júıesin qurý eskerilgen.

Jalpy otyrys barysynda senatorlar bul qujatqa sot júıesiniń jáne «Astana» halyqaralyq qarjy ortalyǵynyń qyzmetine baılanysty ózgertýler engizýdi usyndy.

Zań jobasyn talqylaý barysynda zań jobasyna AHQO organdarynyń ókilettikterine, «Qazaqstan Respýblıkasynyń sot júıesi men sýdıalarynyń mártebesi týraly» Konstıtýtsııalyq zańnyń jekelegen normalaryn qoldanysqa engizý merzimderine, sondaı-aq qoldanysqa engizý merzimderin tsıfrlyq aktıvter salasyndaǵy zań jobalarynyń normalarymen úndestirýge qatysy bar keıbir erejelerge qatysty ózgerister men tolyqtyrý engizý qajet ekeni aıtyldy.

Nátıjesinde Senattyń túzetýleri engizilip, zań jobasy Májiliske qaıtaryldy.