Senat Astana Hub-qa qatysty zańdy maquldady
ASTANA. KAZINFORM — Búgin Senattyń jalpy otyrysynda «Keıbir zańnamalyq aktilerge ınnovatsııalyq qyzmet salasyn memlekettik qoldaý júıesin jetildirý jáne memlekettik statıstıka máseleleri boıynsha ózgerister men tolyqtyrýlar engizý týraly» zańy eki oqylymda qaralyp, maquldandy.
Zańnyń maqsaty — ınnovatsııalyq qyzmetti memlekettik qoldaý júıesin odan ári jetildirý jáne jańa tehnologııalar engizý men Qazaqstan ekonomıkasynyń básekege qabilettiligin arttyrý úshin qolaıly jaǵdaılar jasaý.
Senattyń Ekonomıkalyq saıasat, ınnovatsııalyq damý jáne kásipkerlik komıtetiniń málimetine qaraǵanda, osy qujat 2 Kodekske jáne 10 zańǵa ózgerister men tolyqtyrýlar engizýdi kózdeıdi.
Astana Hub halyqaralyq tehnologııalyq parki men «Innovatsııalyq tehnologııalar parki» derbes klasterlik qoryn Astana Hub derbes klasterlik qoryna biriktirý aıasynda uǵymdyq apparatty sáıkestikke keltirý, sondaı-aq Qordyń fýnktsııalaryn jáne ınnovatsııalyq qyzmetti qoldaý quraldaryn ońtaılandyrý bóliginde jáne basqa da túzetýler engiziledi.
Qordy qarjylandyrýdy jetildirý bóliginde mynadaı túzetýler:
— Qordyń múlkin alymdar men tólemderdiń ornyna múshelik jarnalar esebinen qalyptastyrý;
— Qordyń múlkinen qatysýshylardyń ǵylymı-zertteý, ǵylymı-tehnıkalyq jumystaryn jáne jobalaryn jyl saıyn qarjylandyrý jónindegi mindettemelerdi oryndaý aıasynda jer qoınaýyn paıdalanýshy jibergen aqshany alyp tastaý kózdeledi.
Venchýrlik naryqty damytý maqsatynda venchýrlik qorlardy qosa qarjylandyrý jónindegi ınnovatsııalyq qyzmetti memlekettik qoldaý sharalaryn usyný men iske asyrýdyń tıimdiligin baǵalaý tetigin engizý, sondaı-aq jeke venchýrlik ınvestorlardy qosa qarjylandyrýdy boldyrmaý bóliginde túzetýler engiziledi.
Tsıfrlyq platformany — Ulttyq ınnovatsııalyq júıeniń biryńǵaı terezesin odan ári damytý sheńberinde ınnovatsııalyq damý salasyndaǵy aqparatty berýge jaýapty ýákiletti memlekettik organdardy aıqyndaý jóninde túzetýler qarastyrylǵan.
Budan basqa, zańda baılanys operatorlarynyń nemese Qazaqstan Respýblıkasynyń aýmaǵynda qyzmetin júzege asyratyn baılanys jelileri ıeleriniń statıstıkalyq qyzmetti júzege asyrý úshin abonentter týraly ıesizdendirilgen derekterdi memlekettik statıstıka salasyndaǵy ýákiletti organǵa usynýyna qatysty túzetý kózdeledi.
«Zańdy tulǵalardy memlekettik tirkeý jáne fılıaldar men ókildikterdi eseptik tirkeý týraly» zańyna Ekonomıkalyq qyzmet túrleriniń jalpy jikteýishine (EQJJ) sáıkes sýbektilerge qyzmet túrlerin durys berý, sondaı-aq memlekettik derekqorlarda Ekonomıkalyq qyzmet túrleri týraly aqparatty kórsetýdiń biregeıligi maqsatynda túzetý engiziledi.
Sondaı-aq qaıtalanatyn fýnktsııalardy boldyrmaý jáne odan ári bıýrokratııadan aryltý maqsatynda Úkimet janyndaǵy Tehnologııalyq saıasat jónindegi keńesti taratý jóninde túzetýler engizilip, onyń birqatar fýnktsııasy Qazaqstan Respýblıkasynyń Úkimeti janyndaǵy Joǵary ǵylymı-tehnıkalyq komıssııasyna beriledi.
Kásipkerlik kodekske túzetýler sheńberinde osyndaı venchýrlik qorlar aktıvteriniń (búkil portfeliniń) kiristiligi (zalaldylyǵy) negizinde venchýrlik qorlardy qosa qarjylandyrý jónindegi ınnovatsııalyq qyzmetti memlekettik qoldaý sharalaryn usyný jáne iske asyrý tıimdiligin baǵalaýdy júzege asyrýǵa qatysty norma kózdeledi.
Eske salsaq, Astana Hub-qa tirkelgen kompanııalar múshelik jarna tóleıtinin jazǵan edik.