Semserlesýden lıtsenzııalyq týrnırde el namysyn kimder qorǵaıdy

ASTANA. KAZINFORM – 22-24 naýryz kúnderi Grýzııa astanasy Tbılısıde shpagamen semserlesýden álem kýbogi kezeńi ótedi. 

QR Ulttyq olımpıadalyq komıteti málim etkendeı, atalǵan kezeńde álemniń 60-tan astam elinen jınalǵan sportshylar reıtıngilik upaı men Parıj Olımpıadasynyń joldamasy úshin tartysqa túsedi. Ásirese, bul doda qazaqstandyq shpagashylar úshin mańyzdy bolmaq. Sebebi, Rýslan Kýrbanov pen Elmır Alımjanov bastaǵan qurama tarıhta tuńǵysh ret komandalyq synda lıtsenzııa jeńip alýy múmkin.

Grýzııadaǵy álem kýbogine Qazaqstan sapynan 12 sportshy qatysady.

Olar: Rýslan Kýrbanov, Elmır Alımjanov, Erlik Sertaı, Vadım Sharlaımov, Aleksandr Fedotov, Alekseı Kasatkın, Bogdan Lýkın, Kırıll Pavlov, Kırıll Prohodov, Aleksandr Savın, Georgıı Tınnıkov, Nıkıta Jýlınskıı.

22-23 naýryz kúnderi shpagadan jekeleı syndaǵy jeńimpazdar anyqtalsa, 24 naýryzda komandalyq jarystan Olımpıada joldamasynyń taǵdyry sheshiledi.

Qazirgi tańda Qazaqstan komandasy Grýzııada oqý-jattyǵý jıynyna qatysyp jatyr. Quramadaǵy 12 sportshynyń ishinen tórt sportshy joldamaǵa talasady. Olar - Rýslan Kýrbanov, Elmır Alımjanov, Erlik Sertaı, Vadım Sharlaımov tórttigi.

Eger Tbılısıdegi álem kýbogi kezeńinde qazaqstandyq sátti óner kórsetip, joldamaǵa qol jetkizetin bolsa, Qazaqstanǵa Parıj Olımpıadasynyń tórt joldamasy beriledi. Onyń úsheýi jekeleı synǵa, bireýi tutas komandaǵa tabystalmaq.

Aıta ketelik, Grýzııadaǵy álem kýbogi kezeńinde shpagamen semserlesýden Qazaqstan komandasy Azııa qurlyǵyndaǵy jalǵyz joldamaǵa talasady. Álemdik uıym qaǵıdasy boıynsha, olımpıadalyq reıtıngte alǵashqy tórt orynda turǵan komandalar avtomatty túrde jazǵy oıyndarǵa qatysady. Al qalǵan quramalary qurlyqqa bólinetin bir joldamany sarapqa salady.

Qazirgi kezeńde Qazaqstan komandasy olımpıadalyq reıtıngte besinshi orynda tur. Sońǵy ret Qazaqstan komandasy Ońtústik Koreıamen Hanchjoýdaǵy jazǵy Azııa oıyndarynda kezdesip, iri eseppen utqan bolatyn.