Semeılik qyz Tájikstan azamatyn 700 myń teńgege aldap ketken

SEMEI. QazAqparat – Semeı qalasynda ózge eldiń azamatyna alaıaqtyq jasaǵan qyzǵa qatysty qylmystyq is qozǵaldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, polıtsııaǵa Semeı qalasynda turatyn Tájikstan Respýblıkasynyń 30 jastaǵy azamaty júgingen. Óz sózinde ol dúkenine kelgen beıtanys qyzdyń satyp alǵan taýaryna aqshany mobıldi banktik qosymsha arqyly tóleımin dep aldap soqqanyn jetkizdi.

«Belgili bolǵandaı, 21 jastaǵy qyz qyrkúıek-qazan aılary aralyǵynda jábirlenýshiden jańǵaq pen kepken jemis túrlerin birneshe ret alǵan. Alaıda sol kúıi aqshasyn jibermedi. Osylaısha, Tájikstan azamatyna 700 000 teńge mólsherinde materıaldyq zalal keltirilgen», - delingen aqparatta.

Jedel-izdestirý sharalaryn júrgizgen polıtsııa qyzmetkerleri kúdiktini qolǵa túsirdi. Qazirgi ýaqytta atalǵan fakti boıynsha QR QK-niń 190-baby 1-bóligine sáıkes sotqa deıingi tergeý amaldary bastaldy.