Semeıdiń ortalyq kósheleriniń birine Qaıym Muhamedhanovtyń esimi berildi

ASTANA.QazAqparat - Saıası qýǵyn-súrgin qurbandaryn eske alý kúni Semeıdiń burynǵy Internatsıonal kóshesine belgili ǵalym, abaıtanýshy, tuńǵysh qazaq ánuranynyń avtory Qaıym Muhamedhanovtyń esimin berý saltanatty sharasy ótti.

Atalǵan kóshege ǵalymnyń esimin berý máselesi on jyl boıy kóterilip keldi.  Osy aralyqta oblystyq jáne respýblıkalyq memlekettik organdarǵa 14 usynys jasalǵan, dep habarlaıdy BAQ.

Qaıym Muhamedhanov 1940 jyly Semeı qalasyndaǵy Abaı mýzeıiniń negizin qalady.

1951 jyldyń 1 jeltoqsanynda «Abaıdyń ádebı mektebi» taqyrybyndaǵy kandıdattyq dıssertatsııasyn qorǵaǵannan keıin, tutqynǵa alynyp, 1952 jyldyń 31 mamyrynda QKSR Joǵarǵy sotynyń qaýlysymen halyq jaýy retinde 25 jyl bas bostandyǵynan aıyryldy (otyz betke jýyq aıyptaý jazylǵan).

Stalınniń óliminen keıin tolyqtaı aqtalyp, týǵan jerine oraldy.

Saltanatty shara barysynda Semeı qalasynyń ákimi Ermak Sálimov bul bastamaǵa qoldaý kórsetip, ǵalym esimin máńgi este qaldyrý  isine  atsalysqandarǵa alǵysyn bildirdi.

Aıta keteıik, kóshe atyn ózgertý máselesin uzaq jyldar boıy  qoǵam qaıratkerleri, ardagerler, ǵalymdar jáne jastar kóterip keldi. Olardyń biri - fılologııa ǵylymdarynyń doktory Arap Espenbetov. Shara barysynda A.Espenbetov bir kezderi Qaıym Muhamedhanovtyń shákirti bolǵandyǵyn eske alyp, endi bul kóshe boıymen maqtanysh sezimimen júrip ótetindigin aıtty.