Semeıdegi Abaı mýzeıine qytaı tilindegi kitaptar tartý etildi
Kezdesý barysynda ekspedıtsııa músheleri mýzeıge Qytaıda Abaıdy alǵash zerttegen aýdarmashy Hýan Jannyń arnaıy uly aqyn shańyraǵyna jibergen eńbekterin syıǵa tartty. Olardyń qatarynda Abaıdyń tolyq jınaǵy, tańdamaly óleńder jınaǵy, Abaıdyń qarasózderi, «Abaı joly» romanynyń eki tomy bar.
90 jastaǵy aýdamashy Abaıdyń shyǵarmalaryn qytaı tiline aýdaryp qana qoımaı, zerttep júrgen azamat. Mýzeı qoryna tabystalǵan 8 kitaptyń ishinde qarııanyń jańadan shyqqan zertteý eńbekteri bar.
Abaıdyń memlekettik qoryq-mýzeıiniń dırektory Bolat Júnisbekov bar ómirin Abaıǵa arnaǵan ǵalymǵa alǵysyn bildirip, Abaı - Pýshkın shyǵarmalarynyń jınaǵyn syıǵa tartty.
Aıta keteıik, atalmysh ekspedıtsııa músheleri alǵash ret Abaı shańyraǵyna 2016 jyly kelgen.
«Abaıdyń «Jıdebaı-Bórili» memlekettik qoryq-mýzeıine Ertis boıyndaǵy qalalar men eldi mekenderdiń salt-dástúr, turmys-saltyn zertteý maqsatynda Qytaı-Qazaqstan-Reseı baǵyty boıynsha uıymdastyrylǵan ekspedıtsııa 2016 jyly kelip qaıtqan edi. Mýzeı ekspozıtsııasyn tamashalap, ózara pikir alysylǵan. Bul joly aýdarmashynyń Abaı týraly zertteýleri men qytaı tiline aýdarylǵan Abaı shyǵarmalaryn syıǵa tartty. Jalpy áńgimemiz Abaıdyń shyǵarmashylyǵy tóńireginde órbidi»,-dedi mýzeı dırektory Bolat Júnisbekov.
