Semeıde jaraqat alǵan muǵalimge ómir boıy ótemaqy berý usynyldy
ASTANA. KAZINFORM – Semeı qalasynda shyrsha ornatý men bezendirýge bólingen qarajat tekserilip, bıýdjet qarajatyn maqsatsyz paıdalanǵandar jaýapqa tartylýy kerek. Bul týraly Májilis depýtaty Juldyz Súleımenova QR Bas prokýrory Berik Asylovqa saýal joldady. 2024 jylǵy 21 jeltoqsanda №49 mekteptiń qazaq tili men ádebıeti pániniń muǵalimi, 30 jastaǵy Qýat Aıtqalıev ortalyq alańda jańa jyldyq shyrshany bezendirý kezinde bıiktikten qulap, aýyr jaraqat alǵan edi.
– Prezıdent tapsyrmasymen qabyldanǵan «Pedagog mártebesi týraly» zań ustazdardyń zańdy múddesi men quqyqtaryn qorǵaýǵa arnalǵan. Atalǵan zań muǵalimderdiń negizgi qyzmetine jatpaıtyn artyq mindetterden qorǵaýy shart. Alaıda, osy jaǵdaı Pedagog mártebesi týraly Zańdy óreskel buzyp tur. Muǵalimderdi zańsyz jumysqa tartý sheshimin qabyldaǵan jáne «Pedagog mártebesi týraly» Zańdy buzǵan tulǵalardy anyqtap, qatań jaýapkershilikke tartýdy suraımyz, – dedi depýtat búgingi Májilis otyrysynda.
Sondaı-aq, depýtat zardap shekken muǵalimge tolyq medıtsınalyq kómek kórsetýdi jáne zańdy ótemaqy tóleýdi, onyń ishinde pedagogtyń alǵan jaraqatyn óndiristik jaraqat dep tanýdy jáne oǵan ómir boıy óndiristik jaraqatqa beriletin tólemdi taǵaıyndaýdy surady.
– Semeı qalasynda shyrsha ornatý men bezendirýge bólingen qarajatty tekserip, bıýdjet qarajatyn maqsatsyz paıdalanǵandar bolsa, olardy zań aıasynda jaýapqa tartý qarastyrylsyn. «Pedagog mártebesi týraly» zań talaptaryn saqtamaý jaǵdaılaryna baılanysty barlyq bilim berý uıymdarynda tekseris júrgizip, Muǵalimderdiń quqyqtary men qaýipsizdigin qamtamasyz etý boıynsha qosymsha shara qabyldaýdy usynamyz, – dedi J. Súleımenova.
Buǵan deıin Densaýlyq saqtaý mınıstrligi Medıtsınalyq kómek kórsetý departamentiniń dırektory Gúlnar Sársenbaeva Semeıde shyrsha bezendirý kezinde jaraqat alǵan muǵalimniń jaı-kúıi týraly aıtyp berdi.
Oqıǵaǵa baılanysty qala ákiminiń orynbasary Araıbek Hamzaevqa sógis jarııalandy jáne bilim bóliminiń basshysy Birjan Bulabaev qyzmetinen bosatyldy.