Semeıde áleýmettik osal toptaǵy oqýshylar úshin 1000-nan astam noýtbýk alyndy
«Ótken oqý jylynyń tórtinshi toqsanynan bastap mektepter kompıýterlik tehnıkalaryn balalarǵa berdi. Bul 1075 dana kompıýter men noýtbýk. Búginde biz jergilikti bıýdjet qarajatynan taǵy 1159 noýtbýk aldyq. Alýshylardyń tizimin mektepterdegi qamqorshylyq keńester bekitti. Noýtbýkterdi áleýmettik osal toptaǵy balalar ýaqytsha paıdalanýǵa alady. Bir noýtbýktiń quny – 140 myń teńge. Qashyqtan oqytý formaty aıaqtalǵan kezde tehnıka mektepke qaıtarylatyn bolady. Qazir qalada 4500 oqýshy kompıýterlik tehnıkaǵa muqtaj. Jańa oqý jylynyń birinshi toqsanynda noýtbýkteri joq oqýshylarǵa smartfondarmen jumys isteýge týra keldi», - dedi bilim bóliminiń ádiskeri Alfııa Nyǵmatýllına.
Búgingi tańda qala mektepterinde az qamtylǵan otbasylardan shyqqan 8 myńnan astam oqýshy bilim alýda.
«Noýtbýkterdi muqtaj jáne qıyn qarjylyq jaǵdaıǵa tap bolǵan otbasylarǵa taratýǵa tyrystyq», – dedi qalalyq bilim bóliminiń basshysy Natalııa Fesenko.
Aıta keteıik, kompıýterlik tehnıkamen qamtamasyz etý maqsatynda atqarylyp jatqan jumys osymen toqtap qalmaıdy. Aldaǵy ýaqytta respýblıkalyq bıýdjetten taǵy 4 myńǵa jýyq kompıýterlik tehnıka satyp alynady dep kútilýde.
