Semeıde ákim laýazymyna tórt úmitker tirkeldi
ASTANA. KAZINFORM – Semeıde ákimdikke kandıdattardy tirkeý aıaqtaldy, dep habarlaıdy Kazinform tilshisi.
12 qazanda qalada táýelsiz Qazaqstannyń tarıhynda alǵash ret oblys ortalyǵy ákiminiń tikeleı saılaýy ótedi.
Naýqan barysy
Kandıdattardy usyný 28 tamyzda bastaldy. Eki aptanyń ishinde aýmaqtyq saılaý komıssııasyna segiz ótinim tústi. Qujattar tekserilgen soń tórt úmitker tirkeldi.
- Úmitkerlerdi usyný 2025 jyldyń 11 qyrkúıeginde saǵat 18:00-de aıaqtaldy, al tirkeý 16 qyrkúıekte aıaqtaldy. Búginde bizde tórt kandıdat tirkeldi. Biraq olardy UQK men salyq qyzmetinde tekserý kezeńi kútip tur, sondyqtan kandıdattar shyǵyp ketýi múmkin. Nemese qatysýdan ózderi bas tartýy múmkin. Barlyq kandıdattar ózin-ózi usynǵandar, - dep atap ótti aýmaqtyq saılaý komıssııanyń tóraıymy Gúljan Qýanysheva.
Tizimde kim bar?
Ádilet Qojanbaev – Abaı oblysy Kókpekti aýdanynyń qazirgi ákimi. Bul qyzmetke taǵaıyndalǵanǵa deıin bank salasynda jumys istedi, «Qazaqtelekomda» jáne oblystyń qarjy qurylymdarynda basshylyq qyzmetter atqardy. 2022 jyly Abaı aýdandyq qarjy basqarmasyna jetekshilik etti.
Aıbolat Bekjasarov — buryn Semeı qalalyq máslıhatynyń tóraǵasy bolǵan, saılaý qujattarynda ýaqytsha jumyssyz retinde kórsetilgen. Buǵan deıin ol Áleýmettik qyzmet kórsetý ortalyǵyn basqarǵan.
Qanat Shapatov — Balalar men jasóspirimder shyǵarmashylyǵy saraıynyń dırektory, qalalyq máslıhat depýtaty.
Qanysh Tóleýov – Geodezııa, kartografııa jáne qurylys joǵary kolledjiniń dırektory. Qoǵamdyq qyzmette ol Amanat partııasymen jıi aralasady.
Osylaısha, tirkelgen úmitkerlerdiń úsheýiniń bıýdjettik salada jumys tájirıbesi bar, bireýi belsendi ákimshilik qyzmet atqaryp otyr.
Saılaýdyń mańyzdylyǵy
Qazaqstandaǵy oblys ortalyǵynyń turǵyndary qala basshysyn alǵash ret tikeleı saılaı alady. Osy ýaqytqa deıin tikeleı saılaý tártibi aýyldyq okrýgter men aýdan ákimderine qatysty qoldanyldy.
Sarapshylar atap ótkendeı, Semeıdegi saılaý qorytyndysy jańa úlginiń tıimdiliginiń kórsetkishi bolady. Tikeleı daýys berý tájirıbesin elimizdiń basqa da iri qalalaryna taratý bolashaǵy onyń ashyqtyǵy men azamattardyń senimine baılanysty bolmaq.
Buǵan deıin Semeı qalasynyń ákimi Talǵat Muratov qyzmetinen ketkenin habarlaǵan bolatynbyz.