Semeıde Abaıdyń 175 jyldyǵyna oraı tarıhı jádigerler kórmesi ashyldy

SEMEI. QazAqparat - Abaıdyń ádebı- memorıaldyq mýzeıinde aqynnyń 175 jyldyq mereıtoıyna oraı «Altyn Altaı» atty tarıhı jádigerler kórmesi ashyldy, dep habarlaıdy QazAqparat Semeı qalasynyń aqparattyq ortalyǵyna silteme jasap.

Kórme maqsaty - qazaq jerinen tabylǵan tańǵajaıyp qazba jádigerlerimen kópshilikti tanystyrý.

Kórme ekspozıtsııalary - «Berel» memlekettik tarıhı-mádenı mýzeı-qoryǵyndaǵy eksponattar. Olardyń arasynda bizdiń dáýirimizge deıingi IV-III ǵasyrlarda ómir súrgen saq taıpalarynyń turmystyq zattary men basqa da qazba jumystary kezinde tabylǵan tarıhı zattar bar. Buǵy múıizinen jasalǵan at ábzelderi men qalqan, múıizden jasalǵan áshekeıler, Saq qorǵanynan tabylǵan ózge de buıymdar kelýshilerdiń nazaryn aýdaratyny sózsiz. Sondaı-aq ertede tabylǵan adam qańqasyna negizdelgen antropologııalyq jańǵyrtýdan ótken er jáne áıel adamnyń syrt beıneleri de qoıylatyn bolady.

«Abaı atamyzdyń 175 jyldyq mereıtoıy qurmetine oraı uıymdastyrylǵan kórmemizde kelýshilerdi ata-babamyzdyń ómir súrý salty jáne tarıhymen tanystyrýdy maqsat ettik. Munda qoıylǵan ár eksponat mýzeı qoryndaǵy túpnusqa»,- deıdi «Berel» mýzeı-qoryǵynyń dırektory Almas Sarbasov.

Berel qorymy- Qazaqstandaǵy saq dáýiriniń tarıhı eskertkishi. Qorǵan bizdiń dáýirimizge deıingi V-IV ǵasyrlarda turǵyzylǵan. Qorym Shyǵys Qazaqstan oblysy Buqtarma ózeniniń oń jaǵyndaǵy Berel aýylynan jeti shaqyrym qashyqtyqtaǵy ońtústik batystaǵy taýly jazyqta ornalasqan. Búgingi kúni qorymda júzge tarta qorǵan bar. Semeılikter nazaryna bir aı boıy usynylatyn kórmege jıyny júzge tarta jádigerler qoıylǵan.