Semeıde 1000-nan astam adam Ánurandy birge shyrqady
SEMEI. KAZINFORM - 4 maýsym – Qazaqstan Respýblıkasynyń Memlekettik rámizderi kúnine oraı Semeı qalasynda 1000-nan astam adam Ánurandy birge shyrqady.
- Rámizderdiń árqaısysy tereń tarıhı mańyzǵa ıe. Kókte jelbiregen Tý, kúsh-qýat ben bereke-birlikti aıqyndaıtyn Eltańba, saltanatty sátterde shyrqalatyn Ánuran Qazaqstannyń egemendigi men eldiginiń sımvoly. Abaı oblysynda tańerteńnen beri túrli merekelik is-sharalar ótkizilip jatyr. Sonyń ishinde ortalyq alańda ótken aýqymdy patrıottyq fleshmobty erekshe atap ótýge bolady. Alańda bir mezette myńnan astam semeılik Ánurandy shyrqady, - dep habarlady oblys ákimdiginen.
Sharaǵa oblys ákimi Nurlan Uranhaev, ardagerler, depýtattar, qoǵam qaıratkerleri, sarbazdar, tártip saqshylary, memlekettik qyzmetshiler, jastar jáne qala turǵyndary qatysty.
Mereke aıasynda «Beıbitshilik» aralynan ortalyq alańǵa deıingi aralyqta velojarys uıymdastyryldy. Oǵan 200-den astam veloshabandoz qatysty. Jarysta baq synaǵandar patrıottyq fleshmobqa da qosyldy.
Aıta keteıik, búgin jastar arasynda taqyryptyq kórmeler, chellendjder men fleshmobtar ótedi.
