Semeı turǵyny bógde adamnyń joǵalǵan qujaty arqyly nesıe alǵan

NUR-SULTAN. QazAqparat – Semeı qalasynyń turǵyny áleýmettik jeliden qujat joǵaldy degen habarlamany kórip, sol qujattaǵy derekterdi paıdalana otyryp nesıe rásimdegen.

Bul týraly QR ІІM Krımınaldyq polıtsııa departamenti kıberqylmysqa qarsy kúres ortalyǵy basshysynyń mindetin atqarýshy Rústem Dúısetaev málim etti, dep habarlaıdy QazAqparat tilshisi.

«Atyraý oblysy polıtsııa departamentiniń qyzmetkerleri Semeı qalasynyń turǵynyn ustady. Ol áleýmettik jeliden joǵalǵan jeke qujat týraly habarlamany kórip, sol qujattaǵy málimetterdi paıdalaný arqyly shaǵyn nesıe rásimdegen. Al qujattyń naǵyz ıesi óz atynda nesıe baryn bilmegen. Qazirgi tańda osy sekildi alaıaqtyqqa barǵan 350 aıypty ustalyp, is qaralyp jatyr. Alaıaqtar 10 mln teńgeden astam shyǵyn keltirdi», - Rústem Dúısetaev mınıstrlikte onlaın ótken baspasóz máslıhatynda.

Odan bólek, spıker Pavlodar qalasynyń turǵyndary habarlandyrý berý arqyly joq aýyl sharýashylyǵy tehnıkasyn satqanyn aıtty.

«Osy aqpan aıynda Pavlodar qalasynda taǵy bir ınternet alaıaqtyq qylmysynyń beti ashyldy. Qalanyń 3 turǵyny «OLX» ınternet jelisi arqyly aýyl sharýashylyǵy tehnıkalary men dándi-daqyldar satylady dep jalǵan habarlama bergen. Aıyptylar ustalyp, olardan 20 uıaly telefon, 10 sım-karta, 7 bank kartasy tárkilendi. Qazirgi ýaqytta kúdiktilerdiń ózge qylmystarǵa qatysynyń bar-joǵy tekserilip jatyr», - deıdi ol.

Buǵan deıin habarlaǵanymyzdaı Qazaqstanda ınternet alaıaqtyqpen kúresetin arnaıy jedel-tergeý toby quryldy.