Semeı turǵyndarynan sırek kezdesetin balyq tárkilendi

SEMEI. QazAqparat – Semeıde «Ýyldyryq» jedel aldyn alý sharasy barysynda qala turǵyndarynan zańsyz aýlanǵan 300 keli balyq tárkilendi, dep habarlaıdy QazAqparat tilshisi.

Qalalyq Polıtsııa basqarmasy baspasóz qyzmetiniń málimetine súıensek, 29 mamyr kúni «Semeı-Shúlbi» tasjolynyń boıyndaǵy Ertis ózeninde rezeńke qaıyqpen sıntetıkalyq aý arqyly balyq aýlap júrgen eki er adam ustaldy. Olardyń qabynan kókserke, alabuǵa, kúmji (taımen) balyqtary tabylǵan.

«Kúmji (taımen) QR Qyzyl kitabyna engizilgen. Tárkilengen balyq salmaǵy – 33 keli. Qazirgi ýaqytta sotqa deıingi tergeý amaldary júrgizilýde», - dep habarlady vedomstvo ókilderi.

Sonymen qatar Jıenaly aýyldyq okrýginde ornalasqan Balyqtykól boıynda Renault Duster markaly kólik toqtatylǵan. Salonnan 500 metrlik sıntetıkalyq aý, eki oryndyq rezeńke qaıyq, balyq salynǵan eki polıetılendi qap tabyldy. Zańsyz aýlanǵan balyqtyń jalpy salmaǵy 40 kelige jetken.

Esterińizge sala ketsek, óńirde 15 sáýir men 31 mamyr aralyǵynda zańsyz balyq aýlaıtyndarǵa tosqaýyl qoıýǵa arnalǵan «Ýyldyryq» sharasy ótkizilip jatyr.