Semeı qalasynyń joldary qysqa daıyn ba
SEMEI. KAZINFORM – Kún sanap taıap kele jatqan qys mezgiline Semeı qalasynyń joldary qanshalyqty daıyn ? Bul mańyzdy suraqtyń jaýabyn bilý úshin Kazinform tilshisi qala ákimdigine saýalhat joldady.
«Semeıde qys kezine daıyndyq aıasynda birqatar jumys júrgizilip jatyr. Qala boıynsha 100 arnaıy tehnıka bar. Oǵan ártúrli tıptegi jabdyqtalǵan kólikter, jartylaı sferıkalyq jabdyǵy bar traktorlar, tıegishter, samosvaldar, avtogreıderler, qar tıegishter jáne basqa da tehnıkalar kiredi. Qysta joldy kútip-ustaýǵa arnalǵan tehnıka tikeleı memleket tarapynan satyp alynbaıdy. Óıtkeni joldardy kútip-ustaý qala kóshelerine qyzmet kórsetýge memlekettik satyp alý konkýrstaryn jeńip alǵan merdigerlik uıymdar arqyly júzege asyrylady. Konkýrs aıasynda qajetti tehnıka sany kórsetilip, ony keıin merdiger uıymdar qamtamasyz etedi», - deıdi redaktsııamyzǵa jaýap joldaǵan Semeı qalasy ákiminiń orynbasary Jánibek Muqataev.
Joldardy qys mezgilinde kútip-ustaý úshin 4,5 myń tekshe metr ınertti materıal, onyń ishinde qum-tuz qospasy daıyndalǵan. Qalany qardan tazartý úshin merdiger uıymdar shamamen 100 jumysshy men 100 júrgizýshini jumyldyrmaq.
«Ótken qysta qala aýmaǵynan 82 myń tekshe metr qar shyǵaryldy. Al onyń aldyndaǵy qysta 480 myń tekshe metr qar shyǵarylǵan. Qar massasynyń kólemi jaýǵan mólsherine baılanysty. Qar tazalaý kezinde Semeı qalasynda tehnıka eń aldymen qoǵamdyq kólik júretin ortalyq jáne magıstraldyq kóshelerde qoldanylady. Budan keıin ekinshi deńgeıli kósheler men shet aımaqtarda jumystar júrgiziledi», - deıdi Jánibek Muqataev.
Barlyq jumys kezeń-kezeńimen qolǵa alynyp, qar tolyq tazalanǵanǵa deıin jalǵasady. Shahardyń ortalyq kóshelerinde negizgi jumystar túngi jáne tańǵy ýaqytta júrgiziledi.
«Bul keptelis pen kólik quraldarynyń jınalýyn boldyrmaý jáne jol qaýipsizdigin qamtamasyz etý úshin jasalady. Keń magıstraldyq kóshelerde jumystar kúndiz de júrgizilýi múmkin, bul kóliktiń erkin qozǵalysyn qamtamasyz etedi», - deıdi qala ákiminiń orynbasary.
Osy rette, Abaı oblysyndaǵy respýblıkalyq tasjoldardyń jaı-kúıi jaıly da aıta keteıik. Óńir boıynsha 1592 shaqyrym respýblıkalyq mańyzy bar jol bar. Bul joldardyń jeti ýchaskesin «KAJservıs» JShS kútip-ustaıdy. Olardyń 95 arnaıy tehnıkasy saqadaı saı.
«Biz úshin eń bastysy – joldy tazalaý ǵana emes, qaýipsizdikti saqtaý. Joldardyń barlyq jaǵdaıda júrýge jaramdy bolýyn qamtamasyz etýge daıyndalyp jatyrmyz. Bul ásirese shalǵaı eldi mekenderde turatyn jáne taýar jetkizýge táýeldi halyq úshin mańyzdy», - deıdi kompanııanyń óńirlik fılıalynyń dırektory Arsen Temirhanov.
Eske salsaq, osyǵan deıin Óskemen qalasynyń joldary qysqa qanshalyqty daıyn ekendigi týraly jazǵanbyz.