Segiz oblysta tasqyn qaýpi joǵary – Erlan Nysanbaev

ASTANA. KAZINFORM – Ekologııa jáne tabıǵı resýrstar mınıstri Erlan Nysanbaev Úkimet otyrysynda tasqyn qaýpi joǵary aımaqtardy atady.

- 11 naýryzdaǵy jaǵdaı boıynsha, el aýmaǵynyń 71 paıyzy qar jamylǵan. Bul ótken aptamen salystyrǵanda 15 paıyzǵa az. Elimizdiń ońtústiginde Qyzylorda, Túrkistan jáne Jambyl oblystarynda, eldiń batysyndaǵy BQO, Atyraý jáne Mańǵystaý oblystarynda qar erip jatyr. Naýryz aıynda temperatýranyń kóterilýi men jańbyr jaýǵan jaǵdaıda taý ózenderinde erigen qar sýynyń áserinen joǵary tasqyn júrýi múmkin, - dedi ol.

Aıtýynsha, ortalyq, soltústik jáne shyǵys aımaqtarda qar áli qalyńdap jatyr.

- Naýryz aıynda jaýyn-shashyn mólsheri aılyq normadan eki ese jáne odan da kóp túsedi dep kútilýde. Mysaly, Astanada aılyq jaýyn-shashyn mólsheri birinshi onkúndikte ǵana túsip úlgerdi.

Naýryz jáne sáýir aılary ádettegiden jylyraq bolady dep kútilýde, sondaı-aq elimizdiń basym bóliginde jaýyn-shashyn mol bolady, bul kóktemniń tez kelýine jáne sý tasqyny qaýpiniń artýyna yqpal etedi, - dedi Erlan Nysanbaev.

Mınıstrdiń sózinshe, tasqyn qaýipi joǵary aımaqtar mynalar: Aqtóbe, Qostanaı, Ulytaý, Abaı, Qaraǵandy, Aqmola, Soltústik Qazaqstan jáne Shyǵys Qazaqstan oblystary.

Qaýiptiligi ortasha aımaqtar: Almaty, Jetisý, Jambyl, Batys Qazaqstan jáne Atyraý oblystary.

Qaýiptiligi tómen aımaqtar: Pavlodar, Mańǵystaý, Túrkistan jáne Qyzylorda oblystary.

Osyǵan deıin Premer-mınıstr Oljas Bektenovtiń Úkimet otyrysynda memlekettik organdarǵa tasqynǵa daıyndyqty kúsheıtýdi tapsyrǵany týraly jazdyq.